ഇദ്‌ലിബിലെ സൈനിക വ്യോമതാവളത്തിന് നേരെയുള്ള ഇസ്രായേൽ ആക്രമണങ്ങൾ; ശക്തമായി അപലപിച്ച് യുഎഇ

സിറിയൻ അറബ് റിപ്പബ്ലിക്കിലെ ഇദ്ലിബ് ഗവർണറേറ്റിലുള്ള അബു അൽ ദുഹൂർ സൈനിക വ്യോമതാവളത്തിന് നേരെ ഇസ്രായേൽ നടത്തിയ ആക്രമണങ്ങളെ യുഎഇ ശക്തമായി അപലപിച്ചു.

സിറിയയുടെ പരമാധികാരത്തിന്മേലുള്ള ഏതൊരു കടന്നുകയറ്റത്തെയും, അതുപോലെ രാജ്യത്തിന്റെ സുരക്ഷയ്ക്കും സ്ഥിരതയ്ക്കും നേരെയുള്ള ഭീഷണികളെയും പൂർണ്ണമായും തള്ളിക്കളയുന്ന നിലപാട് യുഎഇ ആവർത്തിച്ചു വ്യക്തമാക്കുന്നു.

സിറിയൻ പ്രദേശത്തിന് നേരെ ഇസ്രായേൽ തുടരുന്ന ആക്രമണങ്ങൾ അന്താരാഷ്ട്ര നിയമത്തിന്റെയും, പാലിക്കാൻ ബാധ്യതയുള്ള സിറിയ-ഇസ്രായേൽ 1974-ലെ ‘ഡിസെൻഗേജ്‌മെന്റ്’ കരാറിന്റെയും (സൈനിക പിന്മാറ്റ കരാർ) നഗ്നമായ ലംഘനമാണെന്ന് വിദേശകാര്യ മന്ത്രാലയം പ്രസ്താവനയിൽ ഊന്നിപ്പറഞ്ഞു.

സിറിയയുടെ സ്ഥിരതയ്ക്കും പ്രാദേശിക അഖണ്ഡതയ്ക്കുമുള്ള പിന്തുണയിൽ യുഎഇയുടെ ഉറച്ച നിലപാട് മന്ത്രാലയം ആവർത്തിച്ചു വ്യക്തമാക്കി. സിറിയൻ ജനതയോടുള്ള ഐക്യദാർഢ്യം പ്രഖ്യാപിച്ചതിനൊപ്പം, സുരക്ഷ, സമാധാനം, അന്തസ്സ്, സമാധാനപരമായ സഹവർത്തിത്വം, വികസനം എന്നിവയ്ക്കായുള്ള അവരുടെ അഭിലാഷങ്ങൾ സാക്ഷാത്കരിക്കാൻ ലക്ഷ്യമിട്ടുള്ള എല്ലാ ശ്രമങ്ങൾക്കും പിന്തുണ നൽകുന്നതായും മന്ത്രാലയം ഊന്നിപ്പറഞ്ഞു.

സിറിയൻ പ്രദേശത്തിന് നേരെയുള്ള തുടർച്ചയായ ആക്രമണങ്ങൾ തടയുന്നതിനും, സംഘർഷം വർദ്ധിപ്പിക്കുന്നതോ പ്രാദേശികവും അന്താരാഷ്ട്രവുമായ സമാധാനത്തിനും സുരക്ഷയ്ക്കും ഭീഷണിയാകുന്നതോ ആയ നടപടികൾ അവസാനിപ്പിക്കുന്നതിനും അടിയന്തര നടപടികൾ സ്വീകരിക്കണമെന്ന് രാജ്യം അന്താരാഷ്ട്ര സമൂഹത്തോട് ആഹ്വാനം ചെയ്തു.