‘കേരള’ അല്ല ‘കേരളം’! ബിൽ പാസ്സാക്കി ലോക്സഭ

ലോക്‌സഭ ഓ​ഗസ്റ്റ് 11, ചൊവ്വാഴ്ച ‘കേരളം’ ബിൽ, 2026 ശബ്ദവോട്ടോടെ പാസാക്കി. ഭരണഘടനയിൽ രേഖപ്പെടുത്തിയിട്ടുള്ള ‘കേരള’ എന്ന സംസ്ഥാനത്തിന്റെ പേര് ‘കേരളം’ എന്ന് മാറ്റാനാണ് ബിൽ ലക്ഷ്യമിടുന്നത്.

സംസ്ഥാനത്തിന്റെ ഈ പേര് മാറ്റം ആവശ്യപ്പെട്ട് 2023 ഓഗസ്റ്റിലും 2024 ജൂണിലും കേരള നിയമസഭ ഏകകണ്ഠമായി പാസാക്കിയ രണ്ട് പ്രമേയങ്ങളെ തുടർന്നാണ് ഈ ബിൽ വരുന്നത്.

ഈ വർഷം ഫെബ്രുവരിയിൽ കേന്ദ്ര മന്ത്രിസഭ ഈ നിർദ്ദേശത്തിന് അംഗീകാരം നൽകിയിരുന്നു. തുടർന്ന്, ബിൽ സംസ്ഥാന നിയമസഭയ്ക്ക് അയച്ചു കൊടുക്കുകയും നിയമസഭ അതിനെ ഏകകണ്ഠമായി പിന്തുണയ്ക്കുകയും ചെയ്തു.

ഭരണഘടനയുടെ അനുച്ഛേദം 3 അനുസരിച്ച് സംസ്ഥാനത്തിന്റെ പേര് ‘കേരളം’ എന്ന് മാറ്റാൻ ആവശ്യമായ നടപടികൾ സ്വീകരിക്കണമെന്ന് കേന്ദ്ര സർക്കാരിനോട് അഭ്യർത്ഥിക്കുന്ന പ്രമേയം 2024 ജൂണിൽ സംസ്ഥാന നിയമസഭ ഏകകണ്ഠമായി പാസാക്കി. 2023 ഓഗസ്റ്റിലെ ആദ്യ പ്രമേയത്തിന് ശേഷം നിയമസഭ പാസാക്കുന്ന രണ്ടാമത്തെ പ്രമേയമായിരുന്നു ഇത്.

മലയാളത്തിൽ സംസ്ഥാനത്തിന്റെ പേര് ‘കേരളം’ എന്നാണെന്നും, എന്നാൽ ഇംഗ്ലീഷിലും ഭരണഘടനയുടെ ഒന്നാം ഷെഡ്യൂളിലും പട്ടികപ്പെടുത്തിയിരിക്കുന്നത് ‘കേരള’ എന്നാണെന്നും നിയമസഭ ചൂണ്ടിക്കാട്ടി.

ഈ വാക്കിന്റെ ഏറ്റവും പഴയ പരാമർശങ്ങളിലൊന്ന് ബിസിഇ 257-ലെ അശോക ചക്രവർത്തിയുടെ രണ്ടാം ശിലാശാസനത്തിൽ കാണാം. ശിലാശാസനത്തിൽ പറയുന്നത് ഇങ്ങനെ: ‘ദേവനാമ്പിയ പ്രിയദർശി രാജാവിന്റെ സാമ്രാജ്യത്തിൽ എവിടെയും, അദ്ദേഹത്തിന്റെ അതിർത്തി രാജ്യങ്ങളായ ചോളർ, പാണ്ഡ്യർ, സത്യപുത്രർ, കേതളപുത്രർ (കേരളപുത്രർ)…” (ലിപിശാസ്ത്രജ്ഞൻ ഡി.ആർ. ഭണ്ഡാർക്കർ പരിഭാഷപ്പെടുത്തിയത്).