മുൻ റൊക്കോർഡുകൾ പഴങ്കഥ; ചരിത്രമായി ദുബായ്

ദുബായ്: ലോകത്തിലെ ഏറ്റവും വലിയ മാരത്തോൺ ഓട്ടത്തിനായിരുന്നു ദുബായ് കഴിഞ്ഞ ദിവസം സാക്ഷ്യം വഹിച്ചത്. പ്രധാന പാതയായ ശൈഖ്​ സായിദ്​ റോഡ്​ ഓറഞ്ച്​ കടലായി മാറിയ അത്ഭുതക്കാഴ്ചയ്ക്കാണ്​ ഞായറാഴ്ച രാവിലെ ദുബായ് വേദിയായത്​. ദുബായ് റണ്ണിനായി പതിനായിരങ്ങളാണ്​ ഒഴുകിയെത്തിയത്​.

എല്ലാ പൂർവ റൊക്കോർഡുകളും തിരുത്തിക്കുറിച്ചായിരുന്നു കായികപ്രേമികൾ എത്തിയത്​. ദുബായ് നഗരം ‘ഓറഞ്ചപട’യാൽ ​നിറഞ്ഞ പ്രഭാതം. ആരോഗ്യ സംരക്ഷണത്തിൻറെ പാഠങ്ങൾ പകർന്ന​ ഫിറ്റ്​നസ്​ ചലഞ്ചിൻറെ സമാപന പരിപാടിയായിരുന്നു ദുബായ് റൺ.

രാവിലെ 6.30ന്​ ഫ്യൂചർ മ്യൂസിയത്തിന്​ സമീപത്തായിരുന്നു തുടക്കം. ദുബായ് കിരീടവകാശിയും എക്സിക്യുട്ടീവ്​ കൗൺസിൽ ചെയർമാനുമായ ശൈഖ് ​ഹംദാൻ ബിൻ മുഹമ്മദ് ​ബിൻ റാശിദ്​ ആൽ മക്​തൂം മുന്നിൽ നിന്ന്​ നയിച്ച റണ്ണിൽ ഇത്തവണ 2.26 ലക്ഷം പേരാണ്​ പ​ങ്കെടുത്തത്​. ഏറെ നീള​മേറിയതായിരുന്നു റൺ നിര.

5, 10 കിലോമീറ്ററുകളിലായി ദുബായ് ശൈഖ്​ സായിദ്​ റോഡിലാണ്​ ദുബായ് നിവാസികൾ ഓടാനിറങ്ങിയത്​. ലോകത്തെ ഏറ്റവും വലിയ ‘ഫൺ റൺ’ എന്ന് ​പ്രകീർത്തിക്കപ്പെടുന്ന പരിപാടിയിൽ കഴിഞ്ഞ വർഷം 1.93 ലക്ഷം പേരാണ്​ രജിസ്റ്റർ ചെയ്ത്​ പ​ങ്കെടുത്തത്​.

ഇത്തവണ എല്ലാ മുൻ റൊക്കോർഡുകളും പഴങ്കഥയായി. പ്രായമോ ഫിറ്റ്​നസോ മാനദണ്ഡമല്ലാത്ത റണ്ണിലൂടെ ആരോഗ്യകരമായ സമൂഹം രൂപപ്പെടേണ്ടതിൻറെ സന്ദേശമാണ്​ ദുബായ് റൺ പങ്കുവയ്ക്കുന്നത്​.