ജനസംഖ്യയിൽ വൻവർധനവ്; 144 വർഷത്തിനിടെ ദുബായിലെ ജനസംഖ്യ 12,000-ൽ നിന്ന് 4.58 ദശലക്ഷമായി ഉയർന്നു

2026-ന്റെ തുടക്കം മുതൽ 1,61,000-ത്തിലധികം താമസക്കാർ പുതുതായി എത്തിയതോടെ ദുബായിലെ ജനസംഖ്യ 47.4 ലക്ഷം (4.74 ദശലക്ഷം) കടന്നതായി വ്യാഴാഴ്ച പുറത്തുവന്ന തത്സമയ വിവരങ്ങൾ വ്യക്തമാക്കുന്നു.

ദുബായ് പോപ്പുലേഷൻ ക്ലോക്ക് പ്രകാരം, ജൂലൈ 30-ന് ഉച്ചയ്ക്ക് 1:45-ഓടെ ജനസംഖ്യ 4,741,335 ആയിരുന്നു. മേഖലയിലെ സംഘർഷാവസ്ഥയ്ക്കിടെ താമസക്കാർ വൻതോതിൽ ദുബായ് വിട്ടുപോകുന്നുണ്ടെന്ന തരത്തിൽ പ്രചരിച്ച അവകാശവാദങ്ങൾക്ക് വിരുദ്ധമാണ് ഈ വർധനവ്.

2025 ൽ ദുബായിലെ ജനസംഖ്യയിൽ നല്ലൊരു ശതമാനവും 30 നും 34 നും ഇടയിൽ പ്രായമുള്ളവരാണ്, ഇത് ജനസംഖ്യയുടെ 15.45 ശതമാനം വരും. പീക്ക് സമയങ്ങളിൽ ദുബൈയിൽ ജനസംഖ്യ വർധിക്കും ഇത് ജോലി ചെയ്യാൻ എത്തുന്ന ആളുകളുടെ ശരാശരി 63 ലക്ഷത്തിലെത്തുകയും ചെയ്യുന്നു. ഇതിൽ താമസക്കാരുടെയും എമിറേറ്റിൽ താൽക്കാലികമായി താമസിക്കുന്ന 18 ലക്ഷം കൂടി ചേർന്നതാണിത്.

ജനസംഖ്യയുടെ ഭൂരിഭാഗവും ജോലിക്കോ ടൂറിസത്തിനോ വേണ്ടി ദുബൈയിൽ എത്തുന്നവരാണ്. വിദ്യാർഥികളും കച്ചവടക്കാരും മറ്റ് ഹ്രസ്വകാല സന്ദർശകരും ഈ കണക്കിൽ ഉൾപ്പെടുന്നു. ദുബൈയിൽ ജോലി ചെയ്യുന്നവരുടെ ജനസംഖ്യ ദുബൈയിലെ താമസക്കാരുടെ ജനസംഖ്യയുടെ ഏകദേശം 40 ശതമാനത്തിന് തുല്യമാണെന്നും കണക്കുകൾ പറയുന്നു.

2025-ൽ റെക്കോർഡിനടുത്ത് വളർച്ച

2025-ൽ ദുബായിലെ ജനസംഖ്യയിൽ ഏകദേശം 3,32,000 പേരുടെ വർധനവുണ്ടായി; 2024 അവസാനത്തിൽ 4.248 ദശലക്ഷമായിരുന്ന ജനസംഖ്യ ഒരു വർഷത്തിനുശേഷം 4.58 ദശലക്ഷമായി ഉയർന്നു.

7.5 ശതമാനം എന്ന വാർഷിക വളർച്ചാ നിരക്ക് എമിറേറ്റിൽ ഇതുവരെ രേഖപ്പെടുത്തിയതിൽ ഏറ്റവും ഉയർന്ന നിരക്കുകളിൽ ഒന്നാണ്. 1980-ലെ സെൻസസിൽ രേഖപ്പെടുത്തിയ 8.2 ശതമാനമായിരുന്നു ദുബായിലെ ജനസംഖ്യാ വളർച്ചാ നിരക്കിലെ എക്കാലത്തെയും ഉയർന്ന റെക്കോർഡ്.

1881-ൽ ദുബായിലെ ജനസംഖ്യ 12,000-ൽ താഴെ മാത്രമായിരുന്നുവെന്ന് ചരിത്രരേഖകൾ വ്യക്തമാക്കുന്നു. അതിനുശേഷം ജനസംഖ്യയിൽ ഏകദേശം 380 മടങ്ങ് വർധനവാണുണ്ടായത്.

തത്സമയം പുതുക്കുന്ന ജനസംഖ്യാ വിവരങ്ങൾ

നേരത്തെ, നിശ്ചിത ഇടവേളകളിൽ നടത്തുന്ന പരമ്പരാഗത സെൻസസ് രീതികളെയായിരുന്നു ദുബായ് ആശ്രയിച്ചിരുന്നത്; 1975-നും 2005-നും ഇടയിൽ ഏഴ് സെൻസസുകൾ ഇത്തരത്തിൽ നടത്തിയിരുന്നു.

എന്നാൽ പുതിയ സംവിധാനം, ജനസംഖ്യാ കണക്കുകൾ തുടർച്ചയായി പുതുക്കുന്നതിനായി ഭരണപരമായ രേഖകൾ, സർക്കാർ ഡാറ്റാബേസുകൾ, സ്മാർട്ട് സംവിധാനങ്ങൾ എന്നിവയാണ് ഉപയോഗിക്കുന്നത്.

ജനസംഖ്യാപരമായ പ്രവണതകൾ, ജനങ്ങളുടെ സഞ്ചാരം, താമസരീതികൾ എന്നിവ പഠിക്കുന്നതിനായി ആർട്ടിഫിഷ്യൽ ഇന്റലിജൻസ്, മെഷീൻ ലേണിംഗ്, പ്രെഡിക്റ്റീവ് അനലിറ്റിക്സ് എന്നിവയും ഉപയോഗിക്കുന്നുണ്ട്.

താമസം, ഗതാഗതം, പൊതുസേവനങ്ങൾ (യൂട്ടിലിറ്റീസ്), ആരോഗ്യം, പാർപ്പിടം, വിദ്യാഭ്യാസം, ടൂറിസം, തൊഴിൽ എന്നീ മേഖലകൾ കൈകാര്യം ചെയ്യുന്ന സർക്കാർ ഏജൻസികളിൽ നിന്നുള്ള വിവരങ്ങളെ അടിസ്ഥാനമാക്കിയാണ് ജനസംഖ്യാ കണക്കുകൾ തയ്യാറാക്കുന്നത്.