ഖത്തർ എൽഎൻജി ടാങ്കറിനു നേരെയുണ്ടായ ആക്രമണത്തെ അപലപിച്ച് യുഎഇ

അറേബ്യൻ ഗൾഫിൽ, ഖത്തർ ഗ്യാസ് ട്രാൻസ്‌പോർട്ട് കമ്പനിയുടെ ഉടമസ്ഥതയിലുള്ള ‘അൽ മായിദ’ (Al Maayeda) എന്ന ലിക്വിഫൈഡ് നാച്ചുറൽ ഗ്യാസ് (LNG) ടാങ്കറിനു നേരെ നടന്ന ആക്രമണത്തെ യുഎഇ ശക്തമായി അപലപിച്ചു.

സമുദ്ര ഗതാഗത സുരക്ഷയ്ക്കും ആഗോള ഊർജ്ജ വിതരണത്തിനും ഈ ആക്രമണം ‘ഗുരുതരമായ ഭീഷണി’ ഉയർത്തുന്നുവെന്നും, ഇത് ഗുരുതരമായ പാരിസ്ഥിതിക പ്രത്യാഘാതങ്ങൾക്ക് കാരണമാകുമെന്നും യുഎഇ വിദേശകാര്യ മന്ത്രാലയം പ്രസ്താവനയിൽ വ്യക്തമാക്കി.

പ്രധാനപ്പെട്ട ജലപാതകളുടെ സുരക്ഷയെയും സ്ഥിരതയെയും തകർക്കാൻ ലക്ഷ്യമിട്ടുള്ള ‘അപകടകരമായ ഒരു വഷളാവലി’ (dangerous escalation) ആയാണ് മന്ത്രാലയം ഈ സംഭവത്തെ വിശേഷിപ്പിച്ചത്.

അന്താരാഷ്ട്ര നിയമങ്ങൾ ഉയർത്തിപ്പിടിക്കേണ്ടതിന്റെയും, വാണിജ്യ കപ്പലുകളുടെയും ഊർജ്ജ ടാങ്കറുകളുടെയും അവയിലെ ജീവനക്കാരുടെയും സുരക്ഷ ഉറപ്പാക്കേണ്ടതിന്റെയും, സമുദ്ര ഗതാഗതത്തിലും ഊർജ്ജ വിതരണത്തിലുമുണ്ടാകാനിടയുള്ള തടസ്സങ്ങൾ ഒഴിവാക്കേണ്ടതിന്റെയും ആവശ്യകത ഊന്നിപ്പറഞ്ഞുകൊണ്ട്, യുഎഇ ഖത്തറിന് ഐക്യദാർഢ്യം പ്രഖ്യാപിച്ചു.

വെള്ളിയാഴ്ച വൈകുന്നേരം അറബിക്കടലിലൂടെ സഞ്ചരിക്കുകയായിരുന്ന ‘അൽ മായിദ’ (Al Maayeda) എന്ന കപ്പലിനു നേരെ അജ്ഞാതമായ വസ്തുക്കളിൽ നിന്ന് ആക്രമണമുണ്ടായതായി ഖത്തർ ഗ്യാസ് ട്രാൻസ്‌പോർട്ട് കമ്പനി (നകിലാത്ത് – Nakilat) ഞായറാഴ്ച അറിയിച്ചതായി ഖത്തർ സ്റ്റേറ്റ് ന്യൂസ് ഏജൻസി റിപ്പോർട്ട് ചെയ്തു.

ഖത്തർ സ്റ്റോക്ക് എക്‌സ്‌ചേഞ്ചിൽ പ്രസിദ്ധീകരിച്ച പ്രസ്താവനയിൽ, കപ്പലിലെ ജീവനക്കാർക്കാർക്കും പരിക്കേറ്റിട്ടില്ലെന്നും സംഭവത്തെത്തുടർന്ന് പരിസ്ഥിതിക്ക് യാതൊരു ദോഷവും സംഭവിച്ചിട്ടില്ലെന്നും നകിലാത്ത് വ്യക്തമാക്കി.

സംഭവത്തിന്റെ ആഘാതം വിലയിരുത്തുന്നതിനുള്ള നടപടികൾ നടന്നുവരികയാണെങ്കിലും, കപ്പൽ സുരക്ഷിതമാണ്; ഇതിലെ സംവിധാനങ്ങളെല്ലാം നിയന്ത്രണവിധേയവുമാണ്. കപ്പൽ തുടർന്നും പ്രവർത്തനക്ഷമമായി തുടരുന്നു.

ഫെബ്രുവരിയിൽ മേഖലയിൽ യുദ്ധം ആരംഭിച്ചതുമുതൽ, കപ്പൽ ഗതാഗതത്തിന്മേൽ നിയന്ത്രണം സ്ഥാപിക്കുന്നതിന്റെ ഭാഗമായി ഹോർമുസ് കടലിടുക്കിലൂടെ സഞ്ചരിക്കുന്ന കപ്പലുകളെ ഇറാൻ ലക്ഷ്യമിടുന്നുണ്ട്. ഈ ജലപാതയിലൂടെ സഞ്ചരിക്കാൻ കപ്പലുകൾ തങ്ങളുടെ അനുമതി നേടണമെന്ന് ഇറാൻ ആവശ്യപ്പെടുന്നു.