തേജസ് ഒരു പൈലറ്റ് മാത്രം പറത്തുന്ന ലൈറ്റ് കോംപാക്ട് യുദ്ധവിമാനം; തകർന്നുവീണത് ഇന്ത്യയുടെ അവിഭാജ്യഘടകം

ലോകശ്രദ്ധ ആകർഷിച്ച ദുബായ് എയർ ഷോയ്ക്കിടെ ഇന്ത്യയുടെ അഭിമാനമായ തേജസ് യുദ്ധവിമാനം തകർന്നു വീണ് പൈലറ്റിന് വീരമൃത്യു. ഇന്ത്യൻ വ്യോമസേന പൈലറ്റിന്റെ മരണം ഔദ്യോഗികമായി സ്ഥിരീകരിച്ചു.

ഇന്ന് ഉച്ചയ്ക്ക് 2.10ഓടെ അൽ മക്തൂം അന്താരാഷ്ട്ര വിമാനത്താവളത്തിലായിരുന്നു അപകടം. സംഘമായുള്ള അഭ്യാസങ്ങൾക്കു ശേഷം ഒറ്റയ്ക്ക് പ്രകടനം നടത്തുന്നതിനിടെ വിമാനം നിയന്ത്രണം വിട്ട് താഴേക്ക് പതിക്കുകയായിരുന്നു. ‘നെഗറ്റീവ് ജി ഫോഴ്‌സ് ടേണിൽ’ നിന്ന് വിമാനത്തെ സാധാരണ നിലയിലേക്ക് കൊണ്ടുവരാൻ പൈലറ്റിന് സാധിക്കാതെ വന്നതാണ് അപകടത്തിന് കാരണമായതെന്നാണ് പ്രാഥമിക നിഗമനം.

ഒരു പൈലറ്റ് മാത്രം പറത്തുന്ന ലൈറ്റ് കോംപാക്ട് യുദ്ധവിമാനമാണ് (LCA Tejas) അപകടത്തിൽപ്പെട്ടത്. ഗുരുതരമായി പരിക്കേറ്റ പൈലറ്റിനെ ഉടൻ തന്നെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. ഈ ദുരന്തത്തെ തുടർന്ന് എയർ ഷോ താൽക്കാലികമായി നിർത്തിവച്ചു. സംഭവത്തെക്കുറിച്ച് വ്യോമസേന വിശദമായ അന്വേഷണം പ്രഖ്യാപിച്ചിട്ടുണ്ട്.