ലോകത്തിലെ ഏറ്റവും വലിയ ജലമേള; വേൾഡ് വാട്ടർ ഫോറം 2027 – റിയാദിൽ വെച്ച് നടത്താൻ അപേക്ഷയുമായി സൗദി

2027ൽ റിയാദിൽ നടക്കാനിരിക്കുന്ന വേൾഡ് വാട്ടർ ഫോറത്തിൻ്റെ പതിനൊന്നാമത് സെഷൻ ആതിഥേയത്വം വഹിക്കാൻ സൗദി അറേബ്യ ഔദ്യോഗികമായി അപേക്ഷ സമർപ്പിച്ചു. ജലവിഭവ സുസ്ഥിരത, ജീവിതനിലവാരം മെച്ചപ്പെടുത്തൽ, വികസന ലക്ഷ്യങ്ങളുടെ നേട്ടം, പ്രാദേശികവും ആഗോളവുമായ ഘട്ടങ്ങളിൽ ജലവുമായി ബന്ധപ്പെട്ട പ്രശ്‌നങ്ങളിലെ ഇടപെടൽ എന്നിവയ്ക്കുള്ള രാജ്യത്തിൻ്റെ സമർപ്പണം കണക്കിലെടുത്താണ് പുതിയ നീക്കം.

വേൾഡ് വാട്ടർ കൗൺസിൽ സംഘടിപ്പിക്കുന്ന വേൾഡ് വാട്ടർ ഫോറം ആഗോള പരിപാടിയാണ്. അനുഭവങ്ങൾ പങ്കുവയ്ക്കുന്നതിനും ജലസ്രോതസ്സുകളുടെ പുരോഗതിക്കും സുസ്ഥിരതയ്ക്കും വേണ്ടിയുള്ള സഹകരണ ശ്രമങ്ങൾ പരിപോഷിപ്പിക്കുന്നതിനുമായി ഗവൺമെൻ്റുകൾ, ഓർഗനൈസേഷനുകൾ, ഉദ്യോഗസ്ഥർ, വിവിധ മേഖലകളിലെ വിദഗ്ധർ എന്നിവരാണ് ഇതിൽ പങ്കെടുക്കുന്നത്.

ജലവുമായി ബന്ധപ്പെട്ട ആശയങ്ങൾ, അറിവുകൾ, അന്തർദേശീയ സഹകരണം എന്നിവയുടെ കൈമാറ്റത്തിനുള്ള അവശ്യ വേദിയായി ഫോറം പ്രവർത്തിക്കുന്നു. ലോകമെമ്പാടുമുള്ള ജലസ്രോതസ്സുകളുടെ സുസ്ഥിരമായ മാനേജ്മെൻ്റ് ഉറപ്പാക്കിക്കൊണ്ട്, ആഗോളതലത്തിലെ മികച്ച സമ്പ്രദായങ്ങൾ പ്രദർശിപ്പിക്കാനും സഹകരണത്തിനുള്ള വഴികൾ പര്യവേക്ഷണം ചെയ്യാനും ലോകരാജ്യങ്ങൾ ഫോറത്തെ ഉപയോ​ഗിക്കുന്നു.

ആഗോളതലത്തിൽ ഏറ്റവും ജലദൗർലഭ്യമുള്ള രാജ്യങ്ങളിലൊന്ന് എന്ന നിലയിലാണെങ്കിലും, ഫോറം ആതിഥേയത്വം വഹിക്കാനുള്ള സൗദി അറേബ്യയുടെ ശ്രമത്തെ അതിൻ്റെ അത്യാധുനിക ഇൻഫ്രാസ്ട്രക്ചർ, സമഗ്രമായ ജലമേഖല നിയമനിർമ്മാണം എന്നിവ പിന്തുണയ്ക്കുന്നു.