ഇറാൻ പരമോന്നത നേതാവായി മൊജ്തബ ഖമേനി?! സാധ്യതയേറെ!

ടെഹ്‌റാൻ: യുഎസ് – ഇസ്രായേൽ സംയുക്ത ആക്രമണത്തിൽ ഇറാൻ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ടതിനെ തുടർന്നുണ്ടായ രാഷ്ട്രീയ അനിശ്ചിതത്വങ്ങൾക്കിടയിൽ, ഖമേനിയുടെ മകൻ മുജ്തബ ഖമേനി പുതിയ പരമോന്നത നേതാവായി തിരഞ്ഞെടുക്കപ്പെട്ടുവെന്ന് റിപ്പോർട്ട്. ഇസ്ലാമിക് റെവല്യൂഷനറി ഗാർഡ് കോർപ്സി (ഐആർജിസി) ൻ്റെ സമ്മർദത്തെ തുടർന്ന് ഇറാന്റെ അസംബ്ലി ഓഫ് എക്സ്പെർട്സ് ആണ് മുജ്തബ ഖമേനിയെ പരമോന്നത നേതൃപദവിയിലേക്ക് തിരഞ്ഞെടുത്തതെന്ന് ഇറാൻ ഇൻ്റർനാഷണൽ റിപ്പോർട്ട് ചെയ്തു. അതേസമയം ന്യൂയോർക്ക് ടൈംസിൻ്റെ റിപ്പോർട്ട് പ്രകാരം, ഇതുസംബന്ധിച്ച പ്രഖ്യാപനം ഉണ്ടായിട്ടില്ല. പരമോന്നത നേതൃപദവിയിലേക്ക് ഏറ്റവും കൂടുതൽ സാധ്യത മൊജ്തബ ഖമേനിക്കാണെന്നും റിപ്പോർട്ടിലുണ്ട്.

ആരാണ് മുജ്തബ ഖമേനി?

ആയത്തുള്ള അലി ഖമേനിയുടെ രണ്ടാമത്തെ മകനായ മുജ്തബ ഖമേനി ഇറാന്റെ രാഷ്ട്രീയ – സൈനിക വൃത്തങ്ങളിൽ അതീവ സ്വാധീനമുള്ള വ്യക്തിയാണ്. 1969ൽ മഷാദിലാണ് ജനനം. ഷാ മുഹമ്മദ് റെസ പഹൽവിക്ക് ഭരണം നഷ്ടമായ ഇസ്ലാമിക വിപ്ലവ കാലഘട്ടത്തിലാണ് മുജ്തബയുടെ വളർച്ച. ടെഹ്രാനിലും കോമിലുമായി പഠനം.

55കാരനായ മുജ്തബ ഖമേനിക്ക് പരമോന്നത നേതാവിന്റെ ഓഫീസിലും ഇറാന്റെ കരുത്തുറ്റ സൈനിക വിഭാഗമായ ഇസ്‌ലാമിക് റെവല്യൂഷണറി ഗാർഡ് കോർപ്സിലും വലിയ നിയന്ത്രണമുണ്ടെന്ന് കരുതപ്പെടുന്നു. ഇറാൻ – ഇറാഖ് യുദ്ധത്തിൽ ഐആർജിസിയുടെ ഹബീബ് ബറ്റാലിയനിൽ പ്രവർത്തിച്ചിട്ടുണ്ട്. 2019ൽ യുഎസ് മുജ്തബയ്ക്ക് ഉപരോധം ഏർപ്പെടുത്തി.

ഇറാന്റെ 88 അംഗ ‘അസംബ്ലി ഓഫ് എക്സ്പെർട്സ്’ ആണ് അടുത്ത പരമോന്നത നേതാവിനെ തിരഞ്ഞെടുക്കേണ്ടത്. അതേസമയം ഇറാന്റെ ഭരണഘടനയനുസരിച്ച് പരമോന്നത നേതാവാകാൻ ഉയർന്ന മതപണ്ഡിതനായിരിക്കണം (ആയത്തുള്ള). മുജ്തബ ഒരു മതപണ്ഡിതനാണെങ്കിലും ‘ആയത്തുള്ള’ പദവിയിലേക്കുള്ള അദ്ദേഹത്തിന്റെ ഉയർച്ചയിൽ ചില വിഭാഗങ്ങൾക്കിടയിൽ തർക്കങ്ങളുണ്ട്. ഇറാന്റെ ഇസ്‌ലാമിക് വിപ്ലവം രാജഭരണത്തിനും കുടുംബവാഴ്ചയ്ക്കും എതിരായാണ് ഉണ്ടായത്. അതിനാൽ തന്നെ അലി ഖമേനിക്ക് ശേഷം മകൻ അധികാരത്തിൽ വരുന്നത് വിപ്ലവത്തിന്റെ മൂല്യങ്ങൾക്ക് വിരുദ്ധമാണെന്ന വാദം ഒരു വിഭാഗം ഉയർത്തുന്നുണ്ട്.