പ്രകൃതിസ്നേഹികളുടെ ഖൽബ് കവർന്ന് ഷാർജയുടെ കൽബ തടാകം; വിനോദസഞ്ചാരികളുടെ ഇഷ്ടകേന്ദ്രം

ദുബായ്: ഹാംഗിംഗ് ഗാർഡൻസിന് ശേഷം ഷാർജയിലെ കൽബയിൽ പ്രകൃതി സ്‌നേഹികൾക്കായി ഒരുങ്ങിയിരിക്കുകയാണ് ശാന്തമായ അൽ ഹെഫയ്യ തടാകം. പർവ്വതനിരകൾക്കിടയിൽ സ്ഥിതി ചെയ്യുന്ന ഈ തടാകം പ്രദേശത്തിൻ്റെ ജലസംഭരണിയായും സന്ദർശകർക്ക് ഒരു പുതിയ വിനോദസഞ്ചാര കേന്ദ്രമായും നിർണായക പങ്ക് വഹിക്കും.

സുപ്രീം കൗൺസിൽ അംഗവും ഷാർജ ഭരണാധികാരിയുമായ ഹിസ് ഹൈനസ് ഷെയ്ഖ് ഡോ. സുൽത്താൻ ബിൻ മുഹമ്മദ് അൽ ഖാസിമി മാർച്ച് 30 ന് തടാകം നാടിന് സമർപ്പിച്ചു.

132,000 ചതുരശ്ര മീറ്റർ വിസ്തൃതിയിൽ വ്യാപിച്ചുകിടക്കുന്ന അൽ ഹെഫയ്യ തടാകം ഷാർജയുടെ നഗര അടിസ്ഥാന സൗകര്യ വികസന പദ്ധതികളിലൊന്നാണ്, നഗരത്തിൻ്റെ തന്ത്രപ്രധാനമായ ജലസംഭരണിയായി പ്രവർത്തിക്കാൻ ലക്ഷ്യമിടുന്നു. തടാകത്തിന് 3.2 കിലോമീറ്റർ നീളമുള്ള ജലസംഭരണി ഉണ്ട്, അത് താഴ്ന്ന പ്രദേശങ്ങളിൽ നിന്നും ചുറ്റുമുള്ള പർവതങ്ങളിൽ നിന്നും വെള്ളം അതിലേക്കെത്തുന്നു.

കൂടാതെ, തടാകത്തിലേക്കുള്ള താഴ്‌വരയിലെ ജലത്തിൻ്റെ പ്രവേശനം പരമാവധി കുറയ്ക്കുന്നതിനും മാലിന്യങ്ങളിൽ നിന്നും അവശിഷ്ടങ്ങളിൽ നിന്നും ശുദ്ധീകരിക്കുന്നതിനും മൂന്ന് തടയണകളും ഫിൽട്ടറുകളും സ്ഥാപിച്ചിട്ടുണ്ട്.

തടാകത്തിന് ചുറ്റും 3.17 കിലോമീറ്റർ ഇരട്ട-വരി പാതയുണ്ട്, അതിനാൽ സന്ദർശകർക്ക് തടാകത്തിന് ചുറ്റും വാഹനമോടിക്കാനോ കാൽനടയായി പ്രകൃതിദൃശ്യങ്ങൾ ആസ്വദിക്കാനോ സാധിക്കും. തടാകത്തിൽ ജല-കായിക വിനോദങ്ങളിലേർപ്പെടാനും സാധിക്കും. കൂടാതെ തടാകത്തിന് തൊട്ടുമുകളിലായി കാണുന്ന പർവ്വത നിരകളിലേക്ക് ട്രക്കിം​ഗ് നടത്താനും സാധിക്കും. തടാകത്തിനടുത്തുള്ള 620 ചതുരശ്ര മീറ്റർ തണലുള്ള കളിസ്ഥലത്ത് കുട്ടികൾക്കും വൈവിധ്യമാർന്ന വിനോദങ്ങൾ ആസ്വദിക്കാം.