നാലുലക്ഷം ശൈത്യകാല വസ്ത്രങ്ങൾ ​ഗാസയിലെത്തിക്കാൻ യു.എ.ഇ

യു.എ.ഇ: ഈ ശൈത്യകാലത്ത് നാലുലക്ഷം വരുന്ന വസ്ത്രങ്ങൾ ​ഗാസയിലെത്തിക്കാനാണ് യു.എ.ഇ പദ്ധതിയിടുന്നത്. ഇതുവരെ 16 ലക്ഷത്തിലേറെ ശൈത്യകാല വസ്ത്രങ്ങൾ എത്തിച്ചിട്ടുണ്ട്. 121 ലോറികളും 129 കാർഗോ വിമാനങ്ങളും വഴി ഏകദേശം 10,000 ടൺ സഹായം യു.എ.ഇ ഇതുവരെ ​ഗാസയിൽ വിതരണം ചെയ്തിട്ടുണ്ട്.

സഹായങ്ങളെത്തിക്കാനുള്ള അവസാനഘട്ട തയ്യാറെടുപ്പുകൾ പൂർത്തിയാക്കിയതായി എമിറേറ്റ്‌സ് റെഡ് ക്രെസന്റ് അറിയിച്ചു. ഗാസക്ക് സഹായം എത്തിക്കുന്നതിനായി ആരംഭിച്ച ഗാലന്റ് നൈറ്റ് ത്രീ മാനുഷിക സംരംഭത്തിന്റെ ഭാഗമായി യു.എ.ഇ. ഇതുവരെ 16 ലക്ഷത്തിലേറെ ശൈത്യകാല വസ്ത്രങ്ങൾ ​ഗാസയിൽ എത്തിച്ചിട്ടുണ്ട്.

കൂടാതെ ​ഗാസയിലേക്ക് ശുദ്ധജലം എത്തിക്കാനുള്ള സംവിധാനങ്ങളുടെ ശേഷി യു.എ.ഇ ഇരട്ടിയാക്കി. നാപ്കിനുകൾ, പുതപ്പുകൾ, ടിന്നിലടച്ച ഭക്ഷണങ്ങൾ, ഇലക്ട്രിക് ഹീറ്ററുകൾ എന്നിവയുൾപ്പെടെയുള്ള സഹായങ്ങൾ സംഭരിക്കുന്ന അൽ അരിഷിൽ വെയർഹൗസും തുറന്നിട്ടുണ്ട്.
ഗാസയ്ക്കായി യു.എ.ഇ. ഈജിപ്തിൽ നിർമിച്ച ശൈത്യകാല വസ്ത്രങ്ങൾ റഫ അതിർത്തിക്ക് സമീപം എത്തിക്കും.