യുഎഇയിൽ ശരത്കാലത്തിന് തുടക്കം; ഇന്ന് പകലും രാത്രിയും തുല്യം

യുഎഇയിൽ ഇന്ന് സെപ്റ്റംബർ 22ന് ശരത് കാലം ആരംഭിക്കുന്നു. ലോകമെമ്പാടും ഇന്ന് പകലും രാത്രിയും ഏതാണ്ട് തുല്യമായിരിക്കും. ഈ ഘട്ടത്തിൽ, സൂര്യൻ ക്രമേണ തെക്കോട്ട് ചരിഞ്ഞു തുടങ്ങുന്ന കാലമാണ്. ഇത് വടക്കൻ അർദ്ധഗോളത്തിലുടനീളം താപനിലയിൽ വലിയ കുറവിന് കാരണമാകുന്നു.

യുഎഇയിലെ ശരത് കാലത്ത് പൊതുവേ തണുത്ത കാലാവസ്ഥയായിരിക്കുമെന്ന് എമിറേറ്റ്സ് വാനനിരീക്ഷണ സൊസൈറ്റിയുടെ ചെയർമാനും അറബ് യൂണിയൻ ഫോർ അസ്ട്രോണമി, ബഹിരാകാശ ശാസ്ത്ര അംഗവുമായ ഇബ്രാഹിം അൽ ജർവാൻ ഗൾഫ് ന്യൂസിനോട് വിശദീകരിച്ചു.

സീസണിന്റെ തുടക്കത്തിൽ, പകൽ സമയത്ത് ശരാശരി താപനില 37° സെൽഷ്യസും രാത്രിയിൽ 23° സെൽഷ്യസും ആയിരിക്കും.
ശരത്കാലത്തിന്റെ മധ്യത്തോടെ (നവംബർ 8), പകൽ സമയത്ത് ശരാശരി താപനില 32° സെൽഷ്യസ് ആയും രാത്രിയിൽ 18° സെൽഷ്യസ് ​​ആയും കുറയും.
സീസണിന്റെ അവസാനം (ഡിസംബർ 21), ഉയർന്ന താപനില ശരാശരി 26° സെൽഷ്യസും താഴ്ന്ന താപനില 14°C സെൽഷ്യസും ആയിരിക്കും.
സെപ്റ്റംബർ, ഒക്ടോബർ മാസങ്ങളിൽ ഈർപ്പം താരതമ്യേന ഉയർന്ന നിലയിൽ തുടരുമെന്നും നവംബർ പകുതിയോടെ ക്രമേണ കുറയുമെന്നും അദ്ദേഹം കൂട്ടിച്ചേർത്തു. ശരത് കാലത്തെ ശരാശരി മഴ ഒക്ടോബറിൽ 2 മില്ലിമീറ്ററിൽ താഴെയും, നവംബറിൽ 5–6 മില്ലിമീറ്ററിലും, ഡിസംബറിൽ 16–18 മില്ലിമീറ്ററിലുമായി കുറയും.