പശ്ചിമേഷ്യയിൽ അശാന്തി; ഇറാനിനു നേരെ പുതിയ ഘട്ടം ആക്രമണങ്ങൾ നടത്തി അമേരിക്ക, ഡ്രോണുകളെ നേരിട്ട് കുവൈറ്റ്

ഇറാനെതിരെ കൂടുതൽ കടുപ്പമേറിയ ഭീഷണിയുമായി ട്രംപ് രംഗത്ത്. ‘മതിയെന്ന്’ പറയുന്നതുവരെ ഇറാനെതിരായ സൈനിക ആക്രമണങ്ങൾ തുടരുമെന്ന് ട്രംപ് ആവർത്തിച്ചു. കരാറിന് തയ്യാറായില്ലെങ്കിൽ ഇറാനിൽ ‘ആരും അവശേഷിക്കില്ല’ എന്ന് മുന്നറിയിപ്പ് നൽകിയ പ്രസിഡന്റ്, ഇറാനിലെ ഊർജ്ജ അടിസ്ഥാന സൗകര്യങ്ങൾ ഉൾപ്പെടെയുള്ളവ തകർക്കുമെന്നും ഭീഷണിപ്പെടുത്തി.

ഫോക്സ് ന്യൂസിന് നൽകിയ അഭിമുഖത്തിലാണ് ട്രംപ് തന്റെ നിലപാട് വ്യക്തമാക്കിയത്. ഇറാനെതിരായ യുഎസ് സൈനിക നീക്കം ഇനിയും തുടരുമെന്നും, ഇത് വെറും തുടക്കം മാത്രമാണെന്നും അദ്ദേഹം പറഞ്ഞു. “നിങ്ങൾ ഒരു കരാർ ഉണ്ടാക്കുന്നതാണ് നല്ലത്, അല്ലാത്തപക്ഷം നിങ്ങൾക്ക് ആരും അവശേഷിക്കില്ല,” എന്നായിരുന്നു ട്രംപിന്റെ മുന്നറിയിപ്പ്. അമേരിക്കയിലെ സാധാരണക്കാരുടെ സുരക്ഷയിൽ ശ്രദ്ധാലുവാണെങ്കിലും, കരാറിന് തയ്യാറായില്ലെങ്കിൽ പ്രത്യാഘാതം അതിഭീകരമായിരിക്കുമെന്ന് അദ്ദേഹം വ്യക്തമാക്കി.

ചർച്ചകൾക്ക് ഇറാൻ തയ്യാറായില്ലെങ്കിൽ ആക്രമണത്തിന്റെ വ്യാപ്തി വർദ്ധിപ്പിക്കുമെന്ന് ട്രംപ് ഭീഷണിപ്പെടുത്തി. അടുത്ത ആഴ്ചയോടെ ഇറാന്റെ പവർ പ്ലാന്റുകളും പാലങ്ങളും തകർക്കാനാണ് നീക്കം. “നാളെ രാത്രി ഞങ്ങൾ അവരെ ശക്തമായി ആക്രമിക്കും, പിറ്റേന്ന് രാത്രി അതിലും ശക്തമായി ആക്രമിക്കും. തുടർന്ന് അടുത്ത ആഴ്ച അവരുടെ എല്ലാ പവർ പ്ലാന്റുകളും പാലങ്ങളും ഞങ്ങൾ തകർക്കും,” ട്രംപ് പറഞ്ഞു. ഏകദേശം ഒരു മണിക്കൂർ മുമ്പ് ഇറാനിയൻ ഉദ്യോഗസ്ഥരുമായി അമേരിക്കൻ പ്രതിനിധികൾ സംസാരിച്ചിരുന്നുവെന്നും, അവർ കരാറിന് സമ്മതിക്കുമെന്നാണ് കരുതുന്നതെന്നും അദ്ദേഹം കൂട്ടിച്ചേർത്തു.

ആക്രമണങ്ങളെത്തുടർന്നുണ്ടായ തീപിടുത്തം കുവൈറ്റ് നിയന്ത്രണവിധേയമാക്കി

ഇറാൻ നടത്തിയ ആക്രമണങ്ങളിൽ ഒരു കേന്ദ്രത്തിന് നേരെ ആക്രമണമുണ്ടായതിനെത്തുടർന്നുണ്ടായ തീപിടുത്തം, കുവൈറ്റ് അഗ്നിശമന സേനയുടെ ആറ് യൂണിറ്റുകൾ കുവൈറ്റ് കരസേനയുടെയും നാഷണൽ ഗാർഡിന്റെയും സഹായത്തോടെ നിയന്ത്രണവിധേയമാക്കി.

ആളപായമൊന്നും റിപ്പോർട്ട് ചെയ്തിട്ടില്ലെന്നും നാശനഷ്ടങ്ങൾ ഭൗതികമായവ മാത്രമാണെന്നും കുവൈറ്റ് അഗ്നിശമന സേനയുടെ ഔദ്യോഗിക വക്താവ് ബ്രിഗേഡിയർ ജനറൽ മുഹമ്മദ് അൽ ഗരീബ് അറിയിച്ചു.