500,000 ദിർഹം വരെ പിഴ: സോഷ്യൽമീഡിയയിൽ പോസ്റ്റു ചെയ്യുന്ന പരിഹാസരൂപത്തിലുള്ള കമന്റുകൾ സൂക്ഷിക്കുക

യുഎഇയിൽ അനുമതിയില്ലാതെ ഫണ്ട് ശേഖരിക്കുക, സോഷ്യൽ മീഡിയയിലൂടെ മറ്റുള്ളവരെ അപകീർത്തിപ്പെടുത്തുക, പുതിയ ഷെയറിങ് റൂം നിയമങ്ങൾ ലംഘിക്കുക തുടങ്ങിയ നിയമവിരുദ്ധ പ്രവർത്തനങ്ങൾക്ക് 500,000 ദിർഹം വരെ പിഴ ലഭിക്കാം

ധനസമാഹരണം: അനുമതിയില്ലാതെ പണപ്പിരിവ് നടത്തുകയോ സംഭാവനകൾ സ്വീകരിക്കുകയോ ചെയ്താൽ 100,000 ദിർഹം മുതൽ 500,000 ദിർഹം വരെ പിഴയും, ചില സന്ദർഭങ്ങളിൽ നാടുകടത്തലും ശിക്ഷയായി ലഭിക്കും.

സോഷ്യൽ മീഡിയ ദുരുപയോഗം: ഓൺലൈൻ വഴി മറ്റുള്ളവരെ അപകീർത്തിപ്പെടുത്തുക, പരിഹസിക്കുക, അപമാനകരമായ പോസ്റ്റുകൾ പങ്കുവെക്കുക, വ്യക്തികളുടെ സ്വകാര്യ വിവരങ്ങൾ അനുമതിയില്ലാതെ ഷെയർ ചെയ്യുക എന്നിവയ്ക്ക് 250,000 ദിർഹം മുതൽ 500,000 ദിർഹം വരെ പിഴയും തടവും ലഭിക്കാം.

താമസ നിയമങ്ങൾ: ഫ്ലാറ്റുകൾ സബ്‌ലെറ്റ് ചെയ്യുകയോ, നിയമവിരുദ്ധമായി ബെഡ്‌സ്‌പേസുകളും റൂം ഷെയറിംഗും നടത്തുകയോ ചെയ്താൽ 500 ദിർഹം മുതൽ 500,000 ദിർഹം വരെ പിഴ ചുമത്താം. കുറ്റം ആവർത്തിച്ചാൽ പിഴ 10 ലക്ഷം ദിർഹം വരെയാകാം.

ഒരു കമന്റ് ഇട്ട ആളുടെ ഉദ്ദേശ്യം മാത്രമല്ല, ആ കമന്റ് കാരണം ഇരയായ വ്യക്തിക്ക് ഉണ്ടായ മാനഹാനിയും തുടർന്നുള്ള സൈബർ ആക്രമണങ്ങളും അധികൃതർ പരിശോധിക്കും.

വിദേശികളായ ആളുകൾ ഇത്തരം കേസുകളിൽ പെട്ടാൽ യുഎഇയിൽ എത്തുമ്പോൾ തന്നെ അറസ്റ്റ് ചെയ്യപ്പെടാനോ അല്ലെങ്കിൽ നിയമനടപടികൾക്ക് ശേഷം നാടുകടത്തപ്പെടാനോ സാധ്യതയുണ്ട്. കൂടാതെ യാത്രാവിലക്ക്, ഇലക്ട്രോണിക് ഉപകരണങ്ങൾ കണ്ടുകെട്ടൽ തുടങ്ങിയ മുൻകരുതൽ നടപടികളും ഉണ്ടായേക്കാം.

മറ്റൊരാൾ വ്യാജ ഉൽപ്പന്നങ്ങൾ ഉപയോഗിക്കുന്നു എന്ന് ആരോപിക്കുന്നത് അവർ വഞ്ചന കാണിക്കുന്നു എന്ന് അർത്ഥമാക്കുന്നതിന് തുല്യമാണെന്നും അത് വ്യക്തിഹത്യയുടെ പരിധിയിൽ വരുമെന്നും അഭിഭാഷകർ പറയുന്നു. സോഷ്യൽ മീഡിയയിൽ ഇട്ട കമന്റുകൾ പിന്നീട് ഡിലീറ്റ് ചെയ്തതുകൊണ്ട് മാത്രം നിയമനടപടികളിൽ നിന്ന് രക്ഷപ്പെടാൻ കഴിയില്ലെന്നും വിദഗ്ധർ വ്യക്തമാക്കുന്നു.