ഷാർജയുടെ കിഴക്കൻ മേഖലയിൽ കനത്ത മഴ പെയ്തതിനെ തുടർന്ന് 61 കുടുംബങ്ങളെ സുരക്ഷിത സ്ഥാനത്തേക്ക് മാറ്റി. എമിറേറ്റിൽ മഴക്കെടുതിയിൽ ദുരിതമനുഭവിക്കുന്ന കുടുംബങ്ങളെ മാറ്റിപ്പാർപ്പിച്ചതായും നാല് ഹോട്ടലുകളിൽ പാർപ്പിടം നൽകിയതായും ഷാർജ ഭവനവകുപ്പ് ബുധനാഴ്ച അറിയിച്ചു.
61 എമിറാത്തി കുടുംബങ്ങളിൽ നിന്നും 346 പേരെയാണ് മാറ്റി പാർപ്പിച്ചത്. 56 കുടുംബങ്ങൾക്ക് കൽബ നഗരത്തിലും മൂന്ന് കുടുംബങ്ങൾക്ക് ദിബ്ബ അൽ ഹിസ്‌നിലും രണ്ട് കുടുംബങ്ങൾക്ക് ഖോർ ഫക്കാനിലും അഭയം നൽകി.
അതേസമയം, അധികൃതർ മഴകെടുതി പ്രദേശങ്ങൾ സന്ദർശിച്ച് തകർന്ന വീടുകൾ വിലയിരുത്തി. നാശനഷ്ടങ്ങളുടെ വ്യാപ്തി അവർ പരിശോധിച്ചു, വാസയോഗ്യമല്ലെന്ന് അല്ലെങ്കിൽ തകർച്ചയുടെ അപകടസാധ്യതയുള്ള വസ്തുവകകൾ കണ്ടെത്തി, സ്ഥിരമായ പാർപ്പിടത്തിനുള്ള ക്രമീകരണങ്ങൾ ചെയ്യുന്നതുവരെ സഹായം വാഗ്ദാനം ചെയ്തു.
എമിറേറ്റിൽ ഇനിയും കനത്ത മഴ പെയ്യുമെന്ന് നാഷണൽ സെൻ്റർ ഓഫ് മെറ്റീരിയോളജി (എൻസിഎം) റിപ്പോർട്ട് ചെയ്തു. പൊതുജനങ്ങൾക്ക് ജാഗ്രതാ നിർദ്ദേശവും നൽകിയിട്ടുണ്ട്.
തിങ്കളാഴ്ച രാജ്യത്ത് കനത്ത മഴയും ആലിപ്പഴ വർഷവും ഇടിയും മിന്നലും ഉണ്ടായതോടെ രാജ്യത്തിൻ്റെ കിഴക്കൻ മേഖലയിലെ 700-ലധികം താമസക്കാരെ മാറ്റിപ്പാർപ്പിച്ചതായി ഷാർജ പോലീസ് അറിയിച്ചു.
+ There are no comments
Add yours