അബുദാബി: അബുദാബി ഗതാഗത വകുപ്പ് ഉപഭോക്താക്കൾക്ക് പിഴ അടയ്ക്കാൻ അനുവദിക്കുന്ന “ഈസി പേയ്‌മെന്റ്” സേവനം ആരംഭിച്ചു. ഫസ്റ്റ് അബുദാബി ബാങ്ക്, അബുദാബി കൊമേഴ്‌സ്യൽ ബാങ്ക്, എമിറേറ്റ്‌സ് ഇസ്ലാമിക് ബാങ്ക് എന്നിവയിൽ നിന്നുള്ള ക്രെഡിറ്റ് കാർഡ് ഉടമകൾക്ക് ഈ സേവനം പ്രയോജനപ്പെടുത്താമെന്ന് മുനിസിപ്പാലിറ്റി ആന്റ് ട്രാൻസ്‌പോർട്ട് വകുപ്പിന്റെ (ഡിഎംടി) ഇന്റഗ്രേറ്റഡ് ട്രാൻസ്‌പോർട്ട് സെന്റർ (ഐടിസി) തിങ്കളാഴ്ച അറിയിച്ചു. 2024 ആദ്യ പകുതിയോടെ കൂടുതൽ ബാങ്കുകളെ ഉൾപ്പെടുത്താനാണ് ഐടിസി പദ്ധതിയിടുന്നത്.
ഗതാഗത നിയമലംഘനത്തിനുള്ള പിഴകൾ നിരവധി തവണകളായി അടയ്ക്കാൻ ഈ സേവനം ഉപഭോക്താക്കളെ അനുവദിക്കുന്നു. ഉപഭോക്താക്കൾക്ക് TAMM സേവന കേന്ദ്രങ്ങൾ വഴിയോ അബുദാബി സിറ്റി മുനിസിപ്പാലിറ്റിയുടെയും അൽ ഐൻ സിറ്റി മുനിസിപ്പാലിറ്റിയുടെയും ആസ്ഥാനത്തുള്ള കസ്റ്റമർ ഹാപ്പിനസ് സെന്ററുകൾ വഴിയോ ഈ സേവനം പ്രയോജനപ്പെടുത്താം.
കൂടാതെ മൂന്ന് മാസം, ആറ് മാസം, ഒമ്പത് മാസം അല്ലെങ്കിൽ 12 മാസം, പലിശയോ ലാഭമോ ഇല്ലാതെ, നിശ്ചിത കാലയളവുകളിൽ തവണകളായി പേയ്‌മെന്റുകൾ ഷെഡ്യൂൾ ചെയ്യാനുള്ള സൗകര്യവും ലഭിക്കും. മേൽപ്പറഞ്ഞ കേന്ദ്രങ്ങളിലൊന്നിൽ ക്രെഡിറ്റ് കാർഡ് വഴി പിഴയടച്ച് ഉപഭോക്താക്കൾക്ക് ഈ സേവനം പ്രയോജനപ്പെടുത്താം.
+ There are no comments
Add yours