‘വലിയ ധൈര്യശാലി, ഉത്തരവാദിത്തബോധവും ജനങ്ങളുടെ ജീവനോടുള്ള കരുതലും’; ക്യാപ്റ്റൻ മച്ചാറിന് ഷെയ്ഖ് ഹംദാന്റെ പ്രശംസ

സെപ്റ്റംബർ 30-ന് ഫ്ലൈദുബായ് വിമാനം FZ1073-ന്റെ കോക്ക്‌പിറ്റിലുണ്ടായ തർക്കത്തിനിടെ പരിക്കേറ്റ പൈലറ്റ് ക്യാപ്റ്റൻ സ്മിത് മച്ചാറിനെ ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം സന്ദർശിച്ചു.

ദുബായ് അന്താരാഷ്ട്ര വിമാനത്താവളത്തിൽ നിന്ന് ടെൽ അവീവിലേക്ക് പോവുകയായിരുന്ന ബോയിംഗ് 737 മാക്സ് 8 വിമാനം സൗദി അറേബ്യയിലെ തബൂക്കിലേക്ക് വഴിതിരിച്ചുവിടേണ്ടി വന്നിരുന്നു. സംഭവസമയത്ത് യാത്രക്കാരുടെ സുരക്ഷ ഉറപ്പാക്കുന്നതിൽ കാണിച്ച ധൈര്യത്തെയും ഉത്തരവാദിത്തബോധത്തെയും ഷെയ്ഖ് ഹംദാൻ പ്രശംസിച്ചു.

സ്മിത് മച്ചാർ “ഏറ്റവും ഉയർന്ന തലത്തിലുള്ള ധൈര്യവും ഉത്തരവാദിത്തബോധവും മനുഷ്യജീവനുകളോടുള്ള കരുതലും” പ്രകടിപ്പിച്ചതായി ഷെയ്ഖ് ഹംദാൻ പറഞ്ഞു. രാജ്യത്തിന് അഭിമാനമായ പൈലറ്റിനെ യുഎഇ നേതൃത്വത്തിന്റെ പേരിൽ അദ്ദേഹം അഭിനന്ദിക്കുകയും ചെയ്തു.

“അദ്ദേഹം ഞങ്ങളുടെ ടീമിന്റെയും, ഞങ്ങളുടെ രാഷ്ട്രത്തിന്റെ ചരിത്രത്തിന്റെയും, ഒപ്പം സ്നേഹത്തിന്റെയും സമാധാനത്തിന്റെയും ജീവന്റെയും നാടായ യുണൈറ്റഡ് അറബ് എമിറേറ്റ്‌സിലെ ഞങ്ങളുടെ മാനുഷിക അനുഭവത്തിന്റെയും ഭാഗമാണെന്നതിൽ അഭിമാനിക്കുന്നു,” ഷെയ്ഖ് ഹംദാൻ കൂട്ടിച്ചേർത്തു.

സന്ദർശന വേളയിൽ, ദുബായ് സിവിൽ ഏവിയേഷൻ അതോറിറ്റി പ്രസിഡന്റും എമിറേറ്റ്‌സ് ചെയർമാനും ചീഫ് എക്സിക്യൂട്ടീവുമായ ഷെയ്ഖ് അഹമ്മദ് ബിൻ സയീദ് അൽ മക്തൂം ഷെയ്ഖ് ഹംദാനൊപ്പം ഉണ്ടായിരുന്നു.

ഫ്ലൈറ്റ് ഡെക്കിനുള്ളിൽ മച്ചാറും (Machchhar) ജീവനക്കാരും നേരിട്ട അപകടത്തെക്കുറിച്ചുള്ള പുതിയ വിവരങ്ങൾ പുറത്തുവന്ന സാഹചര്യത്തിലാണ് ഈ സന്ദർശനം നടക്കുന്നത്. വിമാനം ആകാശത്തായിരിക്കെ സഹപൈലറ്റ് ഒരു “ഭീകരപ്രവർത്തനം” നടത്താൻ ശ്രമിച്ചതായി യുഎഇയുടെ അന്വേഷണത്തിൽ സ്ഥിരീകരിച്ചു. അന്വേഷണ റിപ്പോർട്ട് പ്രകാരം, കോക്ക്പിറ്റിനുള്ളിൽ വെച്ച് സഹപൈലറ്റ് പൈലറ്റിനെ ‘ക്രാഷ് ആക്സ്’ (അടിയന്തര സാഹചര്യങ്ങളിൽ ഉപയോഗിക്കുന്ന കോടാലി) ഉപയോഗിച്ച് ആക്രമിക്കുകയും വിമാനത്തിന്റെ നിയന്ത്രണം ഏറ്റെടുക്കാൻ ശ്രമിക്കുകയും ചെയ്തു.

ഫ്ലൈദുബായ് സിഇഒ പൈലറ്റിന് നന്ദി അറിയിച്ചു

സംഭവത്തിൽ ഇടപെട്ട ജീവനക്കാർക്കും യാത്രക്കാർക്കും അഭിനന്ദനപ്രവാഹം തുടരുകയാണ്. വിമാനം സുരക്ഷിതമായി നിലത്തിറക്കിയ ജീവനക്കാരോടും ക്യാപ്റ്റനോടും പൈലറ്റുമാരോടും ഫ്ലൈദുബായ് സിഇഒ ഗൈത്ത് അൽ ഗൈത്ത് തന്റെ “അഗാധമായ നന്ദി” രേഖപ്പെടുത്തി. “വെല്ലുവിളി നിറഞ്ഞ സാഹചര്യത്തിൽ” ജീവനക്കാരെ സഹായിച്ച യാത്രക്കാർക്കും അദ്ദേഹം നന്ദി പറഞ്ഞു.

“ബാധിക്കപ്പെട്ട എല്ലാവർക്കും ആവശ്യമായ പിന്തുണ തുടർന്നും നൽകും,” അദ്ദേഹം കൂട്ടിച്ചേർത്തു.

മച്ചാറിന്റെ ധീരതയെ പ്രശംസിച്ച് യുഎഇ നയതന്ത്രജ്ഞൻ ഗർഗാഷ്

സംഭവത്തിന് ശേഷം മറ്റ് മുതിർന്ന യുഎഇ ഉദ്യോഗസ്ഥരിൽ നിന്നും മച്ചാറിന് പ്രശംസ ലഭിച്ചു. വിമാനയാത്രയ്ക്കിടെ നടത്തിയ ഇടപെടലുകൾക്ക് ലഭിച്ച എല്ലാവിധ അഭിനന്ദനങ്ങളും അർഹിക്കുന്നയാളാണ് ഈ ഇന്ത്യൻ പൈലറ്റെന്ന് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് അൻവർ ഗർഗാഷ് പറഞ്ഞു.