സാഹചര്യം നിയന്ത്രണവിധേയമാക്കാൻ സഹായിച്ച ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാർ, ഫ്ലൈദുബായ് വിമാനം FZ1073-ലെ ജീവനക്കാർ, യാത്രക്കാർ എന്നിവരുടെ അസാധാരണമായ ധൈര്യത്തെയും പെട്ടെന്നുള്ള ഇടപെടലിനെയും ജനറൽ സിവിൽ ഏവിയേഷൻ അതോറിറ്റി (GCAA) അഭിനന്ദിച്ചു.
അസാധാരണമായ അടിയന്തര സാഹചര്യങ്ങൾ നേരിടുന്നതിൽ ആവശ്യമായ സജ്ജതയും സഹകരണവും കൂട്ടായ ഉത്തരവാദിത്തബോധവും പ്രകടമാക്കിക്കൊണ്ട്, അവരുടെ നിർണ്ണായകവും വേഗത്തിലുള്ളതുമായ ഇടപെടലും അതിനു പിന്നിലെ ഉത്തരവാദിത്തബോധവും സാഹചര്യം നിയന്ത്രിക്കാനും കൂടുതൽ ഗുരുതരമായ പ്രത്യാഘാതങ്ങൾ ഒഴിവാക്കാനും സഹായിച്ചുവെന്ന് അതോറിറ്റി വ്യക്തമാക്കി.
ക്യാപ്റ്റൻ സ്മിത് മച്ചാർ സുരക്ഷിതമായി യുഎഇയിൽ തിരിച്ചെത്തിയെന്നും, അദ്ദേഹം ആരോഗ്യവാനാണെന്നും, ആവശ്യമായ വൈദ്യസഹായം ലഭ്യമാക്കുന്നുണ്ടെന്നും GCAA സ്ഥിരീകരിച്ചു.
യുഎഇ അറ്റോർണി ജനറലിന്റെ ഉത്തരവിൻപ്രകാരം പബ്ലിക് പ്രോസിക്യൂഷൻ അംഗങ്ങൾ ഉൾപ്പെടുന്ന അന്വേഷണ സംഘം സംഭവത്തിന്റെ സാഹചര്യങ്ങളെക്കുറിച്ച് അന്വേഷണം നടത്തിവരികയാണെന്ന് ജിസിഎഎ (GCAA) അറിയിച്ചു. അംഗീകൃത നടപടിക്രമങ്ങൾ പാലിച്ചും അന്വേഷണത്തിന്റെ രഹസ്യസ്വഭാവവും വിശ്വാസ്യതയും സംരക്ഷിച്ചും, ബന്ധപ്പെട്ട പ്രാദേശിക, അന്താരാഷ്ട്ര അധികൃതരുമായും സംഘടനകളുമായും ഏകോപിപ്പിച്ചാണ് അധികൃതർ പ്രവർത്തിക്കുന്നത്.
അന്വേഷണത്തിന്റെ കണ്ടെത്തലുകളെ മുൻകൂട്ടി ബാധിക്കുകയോ അതിന്റെ ഗതിയെ സ്വാധീനിക്കുകയോ ചെയ്തേക്കാവുന്ന പ്രചരിക്കുന്ന വിവരങ്ങളിലോ അവകാശവാദങ്ങളിലോ ഈ ഘട്ടത്തിൽ പ്രതികരിക്കില്ലെന്ന് ജി.സി.എ.എ (GCAA) അറിയിച്ചു. ഔദ്യോഗിക സ്രോതസ്സുകളെ മാത്രം ആശ്രയിക്കണമെന്നും, ഊഹാപോഹങ്ങളും സ്ഥിരീകരിക്കാത്ത വിവരങ്ങളും പ്രചരിപ്പിക്കുന്നതിൽ നിന്ന് വിട്ടുനിൽക്കണമെന്നും അധികൃതർ പൊതുജനങ്ങളോട് അഭ്യർത്ഥിച്ചു.
ആവശ്യമായ നടപടിക്രമങ്ങൾ പൂർത്തിയായ ശേഷം അന്വേഷണത്തിന്റെ കണ്ടെത്തലുകളും അതുമായി ബന്ധപ്പെട്ട വിവരങ്ങളും ഔദ്യോഗിക മാർഗ്ഗങ്ങളിലൂടെ അറിയിക്കുമെന്ന് ജി.സി.എ.എ വ്യക്തമാക്കി; വിവരങ്ങൾക്കായി ഔദ്യോഗിക സ്രോതസ്സുകളെ സമീപിക്കണമെന്നും അവർ പൊതുജനങ്ങളോട് നിർദ്ദേശിച്ചു.
+ There are no comments
Add yours