ഷാർജയിലെ വിദ്യാർഥികൾക്ക് ഇനി സൗജന്യമായി ലൈസൻസ് നേടാം; ‘എക്സലൻസ് ലൈസൻസ്’ പ്രഖ്യാപിച്ച് ഷാർജ പോലീസ്

ഷാർജ പോലീസ് യുഎഇയിലെ വിദ്യാർത്ഥികൾക്ക് അവരുടെ അക്കാദമിക് മികവിനും സമൂഹത്തോടുള്ള ഉത്തരവാദിത്തവും വർധിപ്പിക്കാൻ അംഗീകാരം നൽകുന്നതിനായി രണ്ട് പുതിയ പദ്ധതികൾ പ്രഖ്യാപിച്ചു. ഇത് വിദ്യാർത്ഥികളെ അവരുടെ ഭാവി ജീവിതത്തിലേക്ക് സജ്ജരാക്കാൻ സഹായിക്കും.

ഷാർജയിലെ സർക്കാർ സ്കൂളുകളിൽ നിന്ന് ഉന്നത വിജയം നേടുന്ന ആദ്യ 10 വിദ്യാർത്ഥികൾക്ക് ‘ എക്സലൻസ് ലൈസൻസ് ‘ എന്ന പദ്ധതി പ്രകാരം സൗജന്യ ഡ്രൈവിംഗ് ലൈസൻസ് ലഭിക്കും..

കണ്ണ് പരിശോധന, തിയറി, പ്രായോഗിക പരിശീലനങ്ങൾ, പരീക്ഷകൾ, ലൈസൻസ് വിതരണം എന്നിവയുൾപ്പെടെ ഡ്രൈവിംഗുമായി ബന്ധപ്പെട്ട എല്ലാ ചെലവുകളും ഈ പദ്ധതിയിലൂടെ പൂർണ്ണമായും സൗജന്യമായിരിക്കും. യുഎഇ വിദ്യാഭ്യാസ മന്ത്രാലയം, ഷാർജ പ്രൈവറ്റ് വിദ്യാഭ്യാസ അതോറിറ്റി, ഷാർജ ഡ്രൈവിംഗ് ഇൻസ്റ്റിറ്റ്യൂട്ട്, ബെൽഹാസ ഡ്രൈവിംഗ് ഇൻസ്റ്റിറ്റ്യൂട്ട് എന്നിവയുടെ സഹകരണത്തോടെയാണ് ഈ പദ്ധതി നടപ്പിലാക്കുന്നത്.

ഡ്രൈവിംഗ് ലൈസൻസ് നേടുന്നതിലൂടെ വിദ്യാർത്ഥികൾക്ക് സ്വന്തമായി യാത്ര ചെയ്യാനും ദൈനംദിന കാര്യങ്ങളിൽ മറ്റുള്ളവരെ ആശ്രയിക്കാതെ സ്വതന്ത്രമായി കാര്യങ്ങൾ ചെയ്യാനും സാധിക്കും. ഇത് അവരുടെ സർവകലാശാലാ ജീവിതത്തിലും ഭാവി കരിയറിലും വലിയ സഹായകമാകുകയും ചെയ്യും. കൂടാതെ ഡ്രൈവിംഗ് പഠിക്കുന്നതും ലൈസൻസ് നേടുന്നതും ഒരു വലിയ ഉത്തരവാദിത്തമാണ്.

ഗതാഗത നിയമങ്ങൾ പാലിക്കാനും സുരക്ഷിതമായി വാഹനമോടിക്കാനുമുള്ള പരിശീലനം വിദ്യാർത്ഥികളിൽ ഉത്തരവാദിത്തബോധം വളർത്തും. ഇത് അവരുടെ വ്യക്തിജീവിതത്തിലും തൊഴിൽ ജീവിതത്തിലും ഗുണകരമാകും. ഇന്നത്തെ കാലത്ത് മിക്ക ജോലികൾക്കും ഡ്രൈവിംഗ് ലൈസൻസ് ഒരു അടിസ്ഥാന യോഗ്യതയാണ്. സർവകലാശാലാ പഠനത്തിന് ശേഷം ജോലിയിലേക്ക് പ്രവേശിക്കുമ്പോൾ ഈ ലൈസൻസ് അവർക്ക് ഒരു മുതൽക്കൂട്ടായിരിക്കും.