ദുബായ്: ട്രാഫിക് നിയമലംഘനങ്ങള്‍ കണ്ടെത്താന്‍ ആര്‍ട്ടിഫിഷ്യല്‍ ഇന്‍റലിജന്‍സ് ഉപയോഗിച്ച് പ്രവര്‍ത്തിക്കുന്ന അത്യാധുനിക റഡാര്‍ സാങ്കേതികവിദ്യ ദുബായിലെ തെരുവുകളിലും പ്രധാന റോഡുകളിലും നിങ്ങളെ നിരീക്ഷിക്കുന്നുണ്ട്. ആറ് വ്യത്യസ്ത ട്രാഫിക് നിയമലംഘനങ്ങള്‍ കണ്ടെത്താന്‍ കഴിവുള്ളവയാണ് ഈ റഡാറുകള്‍. കെടിസി ഇന്‍റര്‍നാഷണല്‍ വികസിപ്പിച്ചെടുത്ത ഈ റഡാറുകള്‍ റോഡ് സുരക്ഷ മെച്ചപ്പെടുത്താനും ട്രാഫിക് നിയമങ്ങള്‍ കര്‍ശനമായി പാലിക്കുന്നുവെന്ന് ഉറപ്പാക്കാനും ലക്ഷ്യമിടുന്നു.
ഡ്രൈവിങ്ങിനിടെ മൊബൈല്‍ ഫോണ്‍ ഉപയോഗിക്കല്‍, പെട്ടെന്നുള്ള ലെയ്ന്‍ മാറ്റം, സീറ്റ് ബെല്‍റ്റ് ധരിക്കാതിരിക്കല്‍, തെറ്റായ ലെയ്‌നില്‍ വാഹനമോടിക്കല്‍, വിന്‍ഡ്ഷീല്‍ഡുകള്‍ക്ക് നിയമവിരുദ്ധമായി ടിന്‍റ് നല്‍കല്‍ തുടങ്ങിയ നിയമലംഘനങ്ങള്‍ നൂതന റഡാറിന് തിരിച്ചറിയാന്‍ കഴിയുമെന്ന് കെടിസി ഇന്‍റര്‍നാഷണല്‍ കമ്പനിയുടെ ജനറല്‍ മാനേജര്‍ ഇയാദ് അല്‍ ബര്‍കാവി പറഞ്ഞു. നിയമ ലംഘനങ്ങളുടെ തത്സമയ ഫൂട്ടേജ് വിശകലനം ചെയ്യുന്നതിനും ലംഘനങ്ങളുടെ കൃത്യമായ കണ്ടെത്തലും ഡോക്യുമെന്റേഷനും ഉറപ്പാക്കുന്നതിനും ഉപകരണം എഐ സാങ്കേതികവിദ്യ ഉപയോഗിക്കുന്നു.
ലംഘനങ്ങള്‍ സൂക്ഷ്മമായി കണ്ടെത്തും
‘ആര്‍ട്ടിഫിഷ്യല്‍ ഇന്‍റലിജന്‍സ് റഡാറുകള്‍ നിയമ ലംഘനങ്ങള്‍ കൃത്യമായി തിരിച്ചറിയുമെന്ന് അല്‍ ബര്‍കാവി പറഞ്ഞു. ഉദാഹരണത്തിന്, കുറഞ്ഞ വെളിച്ചത്തില്‍ പോലും വസ്ത്രവും സീറ്റ് ബെല്‍റ്റും തമ്മില്‍ വേര്‍തിരിച്ചറിയാനും സീറ്റ് ബെല്‍റ്റ് ധരിക്കാത്തവരെ കണ്ടെത്താനും ഇതിന് കഴിയും. നിര്‍ബന്ധിത ലെയ്ന്‍ അച്ചടക്കം പാലിക്കുന്നതില്‍ പരാജയപ്പെടുന്നത് കണ്ടെത്താനുള്ള റഡാറിന്‍റെ കഴിവും അംഗീകരിക്കപ്പെട്ടതാണ്. ലെയ്ന്‍ ലംഘനങ്ങള്‍ പലപ്പോഴും ആക്രമണാത്മകമോ അശ്രദ്ധമോ ആയ ഡ്രൈവിങ്ങിന്‍റെ ഫലമാണ്. ഇതിനുള്ള തെളിവുകള്‍ റഡാര്‍ വീഡിയോ
പിടിച്ചെടുക്കും. അത് ഓട്ടോമാറ്റിക്കായി ട്രാഫിക് അധികാരികള്‍ക്ക് അവലോകനത്തിനായി അയയ്ക്കുമെന്നും അല്‍ ബര്‍കാവി വിശദീകരിച്ചു.
അശ്രദ്ധമായ ഡ്രൈവിങ്
അശ്രദ്ധമായ ഡ്രൈവിങ് തിരിച്ചറിഞ്ഞ് റിപ്പോര്‍ട്ട് ചെയ്യാന്‍ ഈ റഡാര്‍ സംവിധാനത്തിന് സാധിക്കും. ഇതു വഴി വലിയ തോതില്‍ അപകടങ്ങള്‍ തടയാനാവും. എഐ ഉപയോഗിച്ച്, റഡാര്‍ ഡ്രൈവറുടെ കൈകളുടെ ചലനങ്ങളും ഫോണ്‍ ലൈറ്റും കണ്ടെത്തുന്നു. ഒരു ഡ്രൈവര്‍ കൈയില്‍ പിടിക്കുന്ന ഉപകരണം ഉപയോഗിക്കുന്നുണ്ടോ എന്ന് കണ്ടെത്താനും റഡാര്‍ സംവിധാനത്തിന് കഴിയും.
നിയമവിരുദ്ധമായ വിന്‍ഡോ ടിന്‍റിങ്
റഡാര്‍ സംവിധാനത്തിന്‍റെ ഏറ്റവും പുതിയ സവിശേഷതകളിലൊന്ന് നിയമവിരുദ്ധമായി ടിന്‍റ് ചെയ്ത വിന്‍ഡ്ഷീല്‍ഡുകള്‍ തിരിച്ചറിയാനുള്ള കഴിവാണ്. മെഡിക്കല്‍ അല്ലെങ്കില്‍ മറ്റ് അംഗീകൃത കാരണങ്ങളാല്‍ ചില ഇളവുകള്‍ നിലവിലുണ്ടെങ്കിലും, അനധികൃത ടിന്‍റിങ് ശിക്ഷാര്‍ഹമാണ്. ഗ്ലാസ്സുകളിലെ ടിന്‍റ് എത്രമാത്രമുണ്ടെന്ന് റഡാര്‍ കാമറകള്‍ സ്‌കാന്‍ ചെയ്യുകയും ലംഘനങ്ങള്‍ കണ്ടെത്തിയാല്‍ അക്കാര്യം ബന്ധപ്പെട്ട അധികാരികള്‍ക്ക് കൈമാറുകയും ചെയ്യുന്നു.
കാല്‍നടക്കാരുടെ സുരക്ഷ
കാല്‍നട ക്രോസിങ്ങുകളില്‍ ഡ്രൈവര്‍മാര്‍ നിയമം പാലിക്കുന്നുണ്ടോ എന്ന കാര്യം കൃത്യമായി നിരീക്ഷിക്കാന്‍ നിര്‍മിതബുദ്ധിയില്‍ നിര്‍മിക്കപ്പെട്ട ഈ റഡാറുകള്‍ക്ക് കഴിയും. കാല്‍നട യാത്രക്കാരുടെ സുരക്ഷ ഉറപ്പാക്കാന്‍ ഇതിലൂടെ കഴിയും. തുടക്കത്തില്‍ വാണിജ്യ മേഖലകളില്‍ സ്ഥാപിച്ച ഈ സംവിധാനം റെസിഡന്‍ഷ്യല്‍ ഏരിയകളിലേക്ക് കൂടി വ്യാപിപ്പിച്ചിട്ടുണ്ട്.
+ There are no comments
Add yours