ദുബായ്: ഇസ്ലാമിക് റിപ്പബ്ലിക്കിനെ “നശിപ്പിക്കുമെന്ന” യുഎസ് പ്രസിഡന്റ് ഡൊണാൾഡ് ട്രംപിന്റെ മുന്നറിയിപ്പിന് മറുപടിയായി, പോപ്പ്-കൾച്ചർ ശൈലിയിലുള്ള ഒരു വ്യത്യസ്ത മാർഗ്ഗം സ്വീകരിച്ചിരിക്കുകയാണ് ഇറാൻ. ഇത്തവണ ആയുധങ്ങളോ ഔദ്യോഗിക പ്രസ്താവനയോ അല്ല, തെലുങ്ക് സിനിമയിലെ ബാലയ്യയുടെ മാസ് ആക്ഷൻ രംഗമാണ് മറുപടിക്കായി ഇറാൻ ഉപയോഗിച്ചത്. സിംബാബ്വെയിലെ ഇറാൻ എംബസിയാണ് നന്ദമൂരി ബാലകൃഷ്ണയുടെ ‘ഭഗവന്ത് കേസരി’യിലെ 58 സെക്കൻഡ് ദൈർഘ്യമുള്ള രംഗം എക്സിൽ പങ്കുവെച്ചത്.
“ട്രംപ് ഇറാനെ ഉന്മൂലനം ചെയ്യുന്നതിനെക്കുറിച്ച് സംസാരിക്കുന്നു. എന്നാൽ ഇറാൻ പ്രതിരോധമില്ലാത്ത രാജ്യമല്ലെന്ന് അദ്ദേഹത്തിനറിയാം. അവർ ഇപ്പോൾ ഹോളിവുഡിന് പകരം ബോളിവുഡ് സിനിമകളാണ് കാണുന്നതെന്ന് ഞങ്ങൾക്കറിയാം” എന്നായിരുന്നു എംബസിയുടെ പോസ്റ്റ്. തോക്കുകളും മറ്റ് ആയുധങ്ങളുമായി എത്തിയ സംഘത്തെ ബാലകൃഷ്ണയുടെ കഥാപാത്രം ഒറ്റയ്ക്ക് നേരിടുന്ന രംഗമാണ് വീഡിയോയിലുള്ളത്.
ഐക്യരാഷ്ട്രസഭാ പൊതുസഭയിലെ പ്രസംഗത്തിനിടെയാണ് ട്രംപ് ഇറാനെതിരെ ശക്തമായ മുന്നറിയിപ്പ് നൽകിയത്. കരാറിലെത്താൻ കഴിയാത്ത പക്ഷം ഇറാനെ “ഉന്മൂലനം” ചെയ്യുമെന്നായിരുന്നു ട്രംപിന്റെ പരാമർശം. അതേസമയം, യുഎൻ സമ്മേളനത്തിനിടെ അമേരിക്കൻ-ഇറാൻ പ്രതിനിധികൾ തമ്മിൽ ഖത്തറിന്റെ മധ്യസ്ഥതയിൽ മണിക്കൂറുകളോളം ചർച്ച നടന്നതായും റിപ്പോർട്ടുണ്ട്. അമേരിക്കൻ പ്രത്യേക പ്രതിനിധി സ്റ്റീവ് വിറ്റ്കോഫും ഇറാൻ വിദേശകാര്യ മന്ത്രി അബ്ബാസ് അറാഘ്ചിയും തമ്മിലുള്ള ചർച്ചകൾക്ക് ഖത്തർ മധ്യസ്ഥത വഹിച്ചതായി റിപ്പോർട്ടുകൾ പറയുന്നു.
‘ഭഗവന്ത് കേസരി’യെക്കുറിച്ച്
2023-ൽ പുറത്തിറങ്ങിയ ‘ഭഗവന്ത് കേസരി’, ബാലകൃഷ്ണൻ അവതരിപ്പിക്കുന്ന ടൈറ്റിൽ കഥാപാത്രം ഒരു യുവതിയെ മാനസികാഘാതത്തിൽ നിന്ന് കരകയറാനും ഇന്ത്യൻ ആർമിയിലെ ഔദ്യോഗിക ജീവിതത്തിനായി അവളെ സജ്ജമാക്കാനും സഹായിക്കുന്നതിനെ ആസ്പദമാക്കിയുള്ളതാണ്.
+ There are no comments
Add yours