റമദാൻ കാലത്ത് ഭക്ഷണശാലകളിലെ പരിശോധന കർശനമാക്കി യു.എ.ഇ: ശുചിത്വ ലംഘനത്തെ തുടർന്ന് അബുദാബിയിൽ റസ്റ്റോറൻ്റ് അടച്ചുപൂട്ടി

അബുദാബി: ശുചിത്വ വ്യവസ്ഥകളും സുരക്ഷാ നിർദ്ദേശങ്ങളും ഭക്ഷണ വിൽപന നിയന്ത്രണവും ലംഘിച്ചതിന് അബുദാബി അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റി (ADAFSA) അൽ നിദാം റെസ്റ്റോറൻ്റ് അടച്ചുപൂട്ടി.

അബുദാബി എമിറേറ്റിലെ ഭക്ഷണവുമായി ബന്ധപ്പെട്ട 2008 ലെ 2-ാം നമ്പർ നിയമത്തിൻ്റെ ലംഘനവും അതിന് അനുസൃതമായി പുറപ്പെടുവിച്ച നിയമനിർമ്മാണവും കാരണം വാണിജ്യ ലൈസൻസ് നമ്പർ CN-1038631 ഉള്ള റസ്റ്റോറൻ്റിനെതിരെ ADAFSA അഡ്മിനിസ്ട്രേറ്റീവ് ക്ലോഷർ തീരുമാനം പുറപ്പെടുവിച്ചു. പൊതുജനാരോഗ്യത്തിന് റെസ്റ്റോറൻ്റ് ഉയർത്തുന്ന അപകടം ചൂണ്ടി കാണിച്ചുകൊണ്ട് കൂടിയാണ് നടപടി.

റെസ്റ്റോറൻ്റിനെതിരായ അഡ്മിനിസ്ട്രേറ്റീവ് അടച്ചുപൂട്ടൽ തീരുമാനം അതിൻ്റെ കാരണങ്ങൾ നിലനിൽക്കുന്നിടത്തോളം തുടരുമെന്ന് അതോറിറ്റി സ്ഥിരീകരിച്ചു. ലംഘനങ്ങൾ പരിഹരിച്ചതിന് ശേഷം ഔട്ട്ലെറ്റ് വീണ്ടും തുറക്കാനാകും.

ഭക്ഷ്യ സുരക്ഷാ ആവശ്യകതകൾ പാലിക്കുന്നുണ്ടെന്ന് ഉറപ്പാക്കാൻ എല്ലാ സ്ഥാപനങ്ങളും അവയുടെ സ്വഭാവവും ഭക്ഷ്യ ഉൽപന്നങ്ങളും പരിഗണിക്കാതെ, അതോറിറ്റിയുടെ ഇൻസ്പെക്ടർമാരുടെ ആനുകാലിക പരിശോധനയ്ക്ക് വിധേയമാണെന്ന് ADAFSA പറഞ്ഞു. ADAFSA എല്ലാ വിപണികളെയും, പ്രത്യേകിച്ച് റമദാനിലെ ഭക്ഷണത്തിനായി തീവ്രമായും ദിവസേനയും നിരീക്ഷിക്കുന്നു.

ഭക്ഷ്യസുരക്ഷാ നിർദ്ദേശങ്ങൾ ലംഘിച്ച് വൃത്തിഹീനമായ സ്ഥലങ്ങളിൽ ഇറച്ചിയും ഭക്ഷണവും സൂക്ഷിച്ചതിന് കഴിഞ്ഞ രണ്ടാഴ്ചയ്ക്കിടെ അബുദാബിയിലെ രണ്ട് ഇറച്ചിക്കടകളും പ്രശസ്തമായ ഒരു സൂപ്പർമാർക്കറ്റും അടച്ചുപൂട്ടി.

ഏതെങ്കിലും ഭക്ഷണശാലകളിൽ എന്തെങ്കിലും ലംഘനങ്ങൾ ശ്രദ്ധയിൽപ്പെട്ടാൽ അല്ലെങ്കിൽ ഭക്ഷ്യവസ്തുവിൻ്റെ ഉള്ളടക്കത്തെക്കുറിച്ച് എന്തെങ്കിലും സംശയം തോന്നിയാൽ അബുദാബി ഗവൺമെൻ്റ് ടോൾ ഫ്രീ നമ്പറായ 800555-ൽ വിളിച്ച് അറിയിക്കണമെന്ന് അതോറിറ്റി പൊതുജനങ്ങളോട് അഭ്യർത്ഥിച്ചു.