യു.എ.ഇയിലുണ്ടായ കനത്ത മഴ: വെള്ളക്കെട്ടിൽ മുങ്ങിയ കാറിൽ നിന്ന് കുടുംബത്തെ രക്ഷിച്ച് ദുബായ് പോലീസ്

യു.എ.ഇ: കഴിഞ്ഞ ദിവസങ്ങളിൽ എമിറേറ്റിലുണ്ടായ അതിശക്തമായ മഴയിൽ സ്തുത്യർഹമായ സേവനമാണ് ദുബായ് പോലീസ് കാഴ്ചവെച്ചത്. ഇപ്പോഴിതാ ദുരന്തമുഖത്ത് നിന്നും അത്തരമൊരു പ്രവർത്തനം നടത്തുന്ന ദുബായ് പോലീസിന്റെ ഒരു വീഡിയോ അണ് സോഷ്യൽ മീഡിയകളിൽ വ്യാപകമായി പ്രചരിക്കുന്നത്.

ദുബായ്-അൽ ഐൻ റോഡിലെ പാലത്തിനടിയിൽ വെള്ളത്തിൽ മുങ്ങിയ വാഹനത്തിൽ കുടുങ്ങിയ ഒരു കുടുംബത്തെ ദുബായ് പോലീസിൻ്റെ എമർജൻസി റെസ്‌പോൺസ് ടീം രക്ഷപ്പെടുത്തുകയായിരുന്നു.

എക്സിൽ പോസ്റ്റ് ചെയ്യ്തിരിക്കുന്ന വീഡിയോയിൽ കനത്ത വെള്ളപ്പൊക്കമുണ്ടായ പ്രദേശത്ത് നിന്ന് ആളുകളെ സുരക്ഷിത സ്ഥാനത്തേക്ക് മാറ്റുന്ന രക്ഷാസംഘം പ്രവർത്തിക്കുന്നത് കാണാനാകും. വെള്ളത്തിൽ മുങ്ങിയ കാറും സംഘം പുറത്തെടുത്തു.

Inflatable boat deployed… #DubaiPolice rescued a family whose car was stuck under a bridge on the Dubai-Al Ain road during heavy rain, demonstrating swift and well-coordinated efforts. pic.twitter.com/3FIrheaDxS

— Dubai Policeشرطة دبي (@DubaiPoliceHQ) March 11, 2024

കനത്ത മഴയെത്തുടർന്ന് യുഎഇയിലുടനീളമുള്ള നിരവധി പ്രദേശങ്ങൾ വെള്ളത്തിനടിയിലായതിനാൽ, താമസക്കാർ വീടിനുള്ളിൽ തന്നെ തുടരാനും വെള്ളം കെട്ടിനിൽക്കുന്ന സ്ഥലങ്ങളിൽ നിന്ന് മാറിനിൽക്കാനും മുന്നറിയിപ്പ് നൽകിയിട്ടുണ്ട്.

ദുബായ് മുനിസിപ്പാലിറ്റി, റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ), ദുബായ് പോലീസ്, മുഹമ്മദ് ബിൻ റാഷിദ് ഹൗസിംഗ് എസ്റ്റാബ്ലിഷ്‌മെൻ്റ്, നഖീൽ എന്നിവയുൾപ്പെടെ വിവിധ സ്ഥാപനങ്ങളിൽ നിന്നായി 2,300 ഉദ്യോഗസ്ഥരെ ദുബായ് അധികൃതർ വിന്യസിച്ചു.

ശനിയാഴ്ച, തൻ്റെ ഇൻസ്റ്റാഗ്രാം സ്റ്റോറികളിലേക്ക്, ദുബായ് കിരീടാവകാശി ഷെയ്ഖ് ഹംദാൻ പോലീസ് ഉദ്യോഗസ്ഥർ, ട്രാഫിക് സുരക്ഷാ ഉദ്യോഗസ്ഥർ, ആർടിഎ ഉദ്യോഗസ്ഥർ, വെള്ളപ്പൊക്കമുള്ള തെരുവുകളിൽ നിന്ന് വെള്ളം പമ്പ് ചെയ്യാൻ സഹായിച്ച തൊഴിലാളികൾ എന്നിവർക്ക് നന്ദി പറഞ്ഞുകൊണ്ട് ഒരു വീഡിയോ പോസ്റ്റ് ചെയ്തിരുന്നു.