ഗുരുതരമായ ഗതാഗത അപകടങ്ങൾക്കെതിരെ മുന്നറിയിപ്പുമായി ദുബായ് പോലീസ്

ദുബായ്: എമിറേറ്റിലുടനീളമുള്ള ഗുരുതരമായ ഗതാഗത അപകടങ്ങൾക്കെതിരെ മുന്നറിയിപ്പുമായി ദുബായ് പോലീസ്. പെട്ടെന്നുള്ള ലെയ്ൻ മാറ്റങ്ങൾ ഏറ്റവും അപകടകരമായ നിയമലംഘനങ്ങളിൽ ഒന്നായി തുടരുന്നുവെന്നും ഇത് പലപ്പോഴും ഗുരുതരമായ കൂട്ടിയിടികൾ, പരിക്കുകൾ, നാശനഷ്ടങ്ങൾ, എന്തിനേറെ മരണത്തിന് പോലും കാരണമാകുന്നുവെന്ന് ഓപ്പറേഷൻസ് അഫയേഴ്‌സ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്രൂയി പറഞ്ഞു.

മാത്രമല്ല ഇത്തരത്തിൽ പെട്ടന്ന് ലെയ്ൻ മാറി എത്തുന്ന വാഹനങ്ങൾ കാരണം അപകടമുണ്ടാകുന്നതിന്റെ ദൃശ്യങ്ങളും ദുബായ് പോലീസ് പങ്കുവച്ചിട്ടുണ്ട്. റോഡ് വ്യക്തമാണെന്ന് ഉറപ്പാക്കാതെയോ അടയാളങ്ങൾ ശ്രദ്ധിക്കാതെയോ ഡ്രൈവർമാർ ലെയ്ൻ മാറ്റിയതും മറ്റ് വാഹനമോടിക്കുന്നവർക്ക് – പ്രത്യേകിച്ച് അതിവേഗ റോഡുകളിൽ – അപകട സാധ്യത വർദ്ധിക്കുന്നതും സമീപകാല നിരീക്ഷണത്തിൽ രേഖപ്പെടുത്തിയിട്ടുണ്ട്.

പെട്ടെന്ന് വാഹനം മറിയുന്നത് സൈഡ്-ഇംപാക്ട് കൂട്ടിയിടികൾ, വാഹന നിയന്ത്രണം നഷ്ടപ്പെടൽ, റോൾഓവറുകൾ, ഒന്നിലധികം വാഹന അപകടങ്ങൾ എന്നിവയ്ക്ക് കാരണമാകുമെന്ന് മേജർ ജനറൽ അൽ മസ്രൂയി കൂട്ടിച്ചേർത്തു. അത്തരം പെരുമാറ്റം മറ്റുള്ളവരുടെ സുരക്ഷയോടുള്ള അവഗണനയും അതിന്റെ ഗുരുതരമായ പ്രത്യാഘാതങ്ങളെക്കുറിച്ചുള്ള അവബോധമില്ലായ്മയുമാണെന്ന് അദ്ദേഹം വിശേഷിപ്പിച്ചു.

റോഡ് സുരക്ഷ ഒരു പൊതു ഉത്തരവാദിത്തമാണെന്ന് അടിവരയിട്ട്, “We Are All Police” സേവനത്തിലൂടെയോ അവരുടെ സ്മാർട്ട് ആപ്പിലെ “Police Eye” സവിശേഷതയിലൂടെയോ 901 വഴി അപകടകരമായ ഡ്രൈവിംഗ് റിപ്പോർട്ട് ചെയ്യാൻ ദുബായ് പോലീസ് പൊതുജനങ്ങളോട് ആവശ്യപ്പെട്ടു…ഫെഡറൽ ട്രാഫിക് നിയമത്തിലെ ആർട്ടിക്കിൾ 29 പ്രകാരം 1,000 ദിർഹം പിഴയും നാല് ബ്ലാക്ക് പോയിന്റുകളുമാണ് ഇത്തരം നിയമലംഘനങ്ങൾക്ക് ശിക്ഷ