യു.എ.ഇയിലെ തൊഴിലാളികൾക്ക് ഭാ​ഗ്യ വർഷം; ശമ്പളം വർധിക്കും, മറ്റ് ആനുകൂല്യങ്ങളും

2024 ൽ യുഎഇയിൽ തൊഴിലാളികൾക്ക് താരതമ്യേന മികച്ച വർഷമായിരിക്കുമെന്നാണ് വിവിധ റിപ്പോർട്ടുകൾ കാണിക്കുന്നത്. വരുമാന വളർച്ചയിൽ സഹായിച്ച അല്ലെങ്കിൽ ഒരു ബിസിനസിന്റെ ഉൽപ്പാദനക്ഷമത വർദ്ധിപ്പിക്കുന്ന ജീവനക്കാരുടെ ശമ്പളം പുതിയ വർഷത്തിൽ ഉയർന്നേക്കുമെന്നും റിപ്പോർട്ടുകൾ പറയുന്നു.

“ഇത് ശമ്പളം മാത്രമല്ല എന്നത് ശ്രദ്ധിക്കേണ്ടതാണ്. മറ്റ് മേഖലകളിൽ അധിക ആനുകൂല്യങ്ങൾ, ഫ്ലെക്സിബിൾ ജോലി, ബോണസ്, സ്കൂൾ വിദ്യാഭ്യാസം, സ്ഥാനക്കയറ്റം, തൊഴിൽ പ്രോത്സാഹനങ്ങൾ, അലവൻസുകൾ അല്ലെങ്കിൽ ഷെയർ ഓപ്ഷനുകൾ എന്നിവ ആയും തൊഴിലാളികൾക്ക് ആനുകൂല്യങ്ങൾ ലഭിക്കാം. ഇത് ഓരോ കമ്പനിയേയും ആശ്രയിച്ചിരിക്കുന്നു. എന്നാൽ എല്ലാ കമ്പനികളും അങ്ങനെ ആയിരിക്കണമെന്നില്ല ” ജിനി റിക്രൂട്ട്‌മെന്റ് മാനേജിംഗ് ഡയറക്ടർ നിക്കി വിൽസണെ ഉദ്ധരിച്ച് ഖലീജ് ടൈംസ് റിപ്പോർട്ട് ചെയ്യുന്നു.

മികച്ച പ്രകടനം സ്ഥിരമായി പ്രകടിപ്പിക്കുകയും ഓർഗനൈസേഷന്റെ പ്രതീക്ഷകൾക്കപ്പുറമുള്ള നേട്ടങ്ങൾ നേടുകയും ചെയ്യുന്ന ജീവനക്കാർക്ക് മെറിറ്റ് അടിസ്ഥാനമാക്കിയുള്ള ശമ്പള വർദ്ധനവ് ഇപ്പോൾ തന്നെ ചർച്ച ചെയ്ത് തുടങ്ങിയിട്ടുണ്ടെന്നും പ്ലം ജോബ്‌സിലെ സിഇഒ ദീപ സുദും പറയുന്നു.

53 ശതമാനം സ്ഥാപനങ്ങളും തങ്ങളുടെ ജീവനക്കാരുടെ ശമ്പളം വർദ്ധിപ്പിക്കുമെന്നാണ് റിക്രൂട്ട്‌മെന്റ് ഏജൻസിയായ കൂപ്പർ ഫിച്ചിന്റെ “സാലറി ഗൈഡ് യു.എ.ഇ 2024” റിപ്പോർട്ട് ചെയ്യുന്നത്. മൂന്നിലൊന്നിൽ കൂടുതൽ – 39 ശതമാനം പേർ വേതനം 5 ശതമാനം വരെ ഉയർത്താനാണ് നോക്കുന്നത്. ഏതാണ്ട് പത്തിലൊന്ന് പേർ 6-9 ശതമാനവും 20-ൽ ഒരാൾ (5 ശതമാനം) 10 ശതമാനമോ അതിൽ കൂടുതലോ വർദ്ധനവിന് തയ്യാറെടുക്കുന്നുവെന്നും റിപ്പോർട്ടുകൾ പറയുന്നു.

മികച്ച നേട്ടം കൊയ്യാൻ ജീവനക്കാർ തങ്ങളുടെ കഴിവുകൾ പ്രകടിപ്പിക്കുകയും കമ്പനിയുടെ ഒരു പ്രധാന ഭാഗമാകുകയും ചെയ്യണമെന്നും തങ്ങളുടെ കടമകൾക്കും ഉത്തരവാദിത്തങ്ങൾക്കും അപ്പുറത്തേക്ക് പോയി കഴിഞ്ഞ വർഷം ചെയ്തതിനേക്കാൾ മികച്ച പ്രകടനം കാഴ്ചവെക്കേണ്ടതുണ്ടെന്നും അപ്‌ഫ്രണ്ട് എച്ച്ആർ മാനേജിംഗ് ഡയറക്ടർ വലീദ് അൻവറിനെ ഉദ്ധരിച്ച് ഖലീജ് ടൈംസ് റിപ്പോർട്ട് ചെയ്യുന്നു.