കുട്ടികൾക്ക് ട്യൂഷനെടുക്കാനും വർക്ക് പെർമ്മിറ്റ് ഏർപ്പെടുത്തി യു.എ.ഇ; സ്വകാര്യ ട്യൂഷനുകൾക്ക് പെരുമാറ്റച്ചട്ടം നിലവിൽ വന്നു

യു.എ.ഇ: അധ്യാപകർക്ക് അവരുടെ സ്വന്തം സ്കൂളുകളിൽ നിന്നുള്ള വിദ്യാർത്ഥികൾക്ക് സ്വകാര്യ ട്യൂഷനുകൾ നൽകുന്നതിൽ നിന്നും വിലക്ക്. ഒരു സ്വകാര്യ ട്യൂഷൻ വർക്ക് പെർമിറ്റ് ലഭിക്കുന്നതിന് അധ്യാപകർ ഒപ്പിടേണ്ട ‘പെരുമാറ്റച്ചട്ടം’നിലവിൽ വന്നു. അധ്യാപകർ അവരുടെ സ്‌കൂളുകളുമായി അഫിലിയേറ്റ് ചെയ്‌തിരിക്കുന്ന വിദ്യാർത്ഥികൾക്ക് നേരിട്ട് ട്യൂഷൻ എടുക്കുന്നതിനെയാണ് വിലക്കിയിരിക്കുന്നത്.

കഴിഞ്ഞ വർഷം ഡിസംബറിൽ, യുഎഇ വിദ്യാഭ്യാസ സ്ഥാപനങ്ങൾക്ക് പുറത്ത് ട്യൂഷൻ നൽകുന്നതിന് പുതിയ അനുമതി പ്രഖ്യാപിച്ചതിനാൽ സ്വകാര്യ ട്യൂഷനുകൾ നിയമവിധേയമാക്കി. പെർമിറ്റ് ആദ്യമായി പ്രഖ്യാപിച്ചപ്പോൾ, അധ്യാപകരെ സ്വന്തം വിദ്യാർത്ഥികളെ സ്വകാര്യമായി പരിശീലിപ്പിക്കുന്നതിൽ നിന്ന് നിരുത്സാഹപ്പെടുത്തുമെന്ന് അധികൃതർ വ്യക്തമാക്കിയിരുന്നു.

“യോഗ്യതയുള്ള അധ്യാപകരെക്കൊണ്ട് സ്കൂൾ സമയത്തിന് പുറത്ത് വിദ്യാഭ്യാസ പാഠങ്ങൾ നൽകുന്ന രീതി” എന്നാണ് ഹ്യൂമൻ റിസോഴ്‌സസ് ആൻഡ് എമിറേറ്റൈസേഷൻ മന്ത്രാലയം സ്വകാര്യ ട്യൂഷനുകളെ നിർവചിച്ചിരിക്കുന്നത്. രണ്ട് വർഷത്തേക്കാണ് അധ്യാപകർക്ക് ട്യൂഷൻ നൽകുന്നതിനായി വർക്ക് പെർമ്മിറ്റ് അനുവദിക്കുന്നത്. രണ്ട് വർഷത്തെ പെർമിറ്റ് ലഭിക്കുന്നതിന് അപേക്ഷകർ സമർപ്പിക്കേണ്ട രേഖകളിൽ ഒപ്പിട്ട പെരുമാറ്റച്ചട്ടവും ഉൾപ്പെടുന്നു.

അധ്യാപകർ അവരുടെ വിദ്യാർത്ഥികളുമായി പ്രൊഫഷണലായിരിക്കുകയും അവർക്ക് ഇമെയിലുകളോ ചിത്രങ്ങളോ അയക്കുന്നത് ഒഴിവാക്കണമെന്നും പെരുമാറ്റച്ചട്ടത്തിൽ പറയുന്നു.

. വിദ്യാർത്ഥികളുമായും രക്ഷിതാക്കളുമായും ബന്ധപ്പെട്ട വിവരങ്ങളുടെ രഹസ്യസ്വഭാവം നിലനിർത്തണം.

. ഒരു കാരണവശാലും വിദ്യാർത്ഥികൾ വാക്കാലോ ശാരീരികമായോ അക്രമത്തിന് വിധേയരാകരുത്.

. സംസ്ഥാനത്തിൻ്റെ ദേശീയ സ്വത്വവുമായി പൊരുത്തപ്പെടാത്ത അസാധാരണമോ തീവ്രവാദമോ ആയ ആശയങ്ങൾ ഉൾക്കൊള്ളുന്ന വിഷയങ്ങളിൽ ഏർപ്പെടരുത്.

എന്നിവയൊക്കെയാണ് പെരുമാറ്റച്ചട്ടത്തിലെ പ്രധാനപ്പെട്ട മുന്നറിയിപ്പുകൾ.