ഇന്ത്യയ്ക്ക് സ്വാതന്ത്ര്യദിനാശംസകളുമായി യുഎഇ നേതാക്കൾ

ഇന്ത്യൻ പ്രസിഡന്റ് ദ്രൗപതി മുർമ്മുവിനും, പ്രധാനമന്ത്രി നരേന്ദ്ര മോദിക്കും സ്വാതന്ത്ര്യദിന സന്ദേശങ്ങളയച്ച് യുഎഇ നേതാക്കൾ. യുഎഇ പ്രസിഡൻ്റ് ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ, യുഎഇ വൈസ് പ്രസിഡൻ്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം, വൈസ് പ്രസിഡൻ്റും ഉപപ്രധാനമന്ത്രിയും പ്രസിഡൻഷ്യൽ കോർട്ട് ചെയർമാനുമായ ഷെയ്ഖ് മൻസൂർ ബിൻ സായിദ് അൽ നഹ്യാൻ എന്നിവരാണ് സന്ദേശം കൈമാറിയത്.

“ഇന്ന്, ഇന്ത്യ അഭിമാനപൂർവ്വം അതിൻ്റെ 78-ാം സ്വാതന്ത്ര്യ ദിനം ആഘോഷിക്കുന്നു, ഇത് രാജ്യത്തിൻ്റെ അവിശ്വസനീയമായ വികസന യാത്രയുടെ സാക്ഷ്യമാണ്. ഈ സുപ്രധാന നാഴികക്കല്ല് ആഘോഷിക്കുന്ന വേളയിൽ, ഇന്ത്യൻ പ്രധാനമന്ത്രി, എൻ്റെ സുഹൃത്ത് നരേന്ദ്ര മോദിക്കും ഇന്ത്യൻ ജനതയ്ക്കും ഞാൻ ഹൃദയംഗമമായ അഭിനന്ദനങ്ങൾ അറിയിക്കുന്നു. ഞങ്ങളുടെ സൗഹൃദം ശക്തിപ്പെടുത്തുന്നതിനും ഉഭയകക്ഷി സഹകരണം മുന്നോട്ട് കൊണ്ടുപോകുന്നതിനും ഞങ്ങളുടെ ശാശ്വത പങ്കാളിത്തത്തിൻ്റെ എല്ലാ വശങ്ങളിലും ശക്തമായ ബന്ധങ്ങൾ വളർത്തിയെടുക്കുന്നതിനും യുഎഇ പ്രതിജ്ഞാബദ്ധമാണ്. നമ്മുടെ ഇന്ത്യൻ സുഹൃത്തുക്കൾക്ക് സന്തോഷകരമായ ഒരു സ്വാതന്ത്ര്യ ദിനം ആശംസിക്കുന്നു” സ്വാതന്ത്ര്യദിനത്തിൽ ആശംസകൾ നേർന്ന് ഷെയ്ഖ് മുഹമ്മദ് ബിൻ റാഷിദും ഹിന്ദിയിൽ ട്വീറ്റ് ചെയ്തു.