യുഎഇ പതാക ദിനം: നവംബർ 3 ന് രാഷ്ട്രചിഹ്നം ഉയർത്തുമ്പോൾ ചെയ്യേണ്ടതും ചെയ്യരുതാത്തതുമായ 10 കാര്യങ്ങൾ

എല്ലാ വർഷവും നവംബർ 3-നാണ് യുഎഇയിൽ പതാക ദിനം ആഘോഷിക്കാറുള്ളത്. രാജ്യത്തിന്റെ സ്ഥാപക പിതാവ് ഷെയ്ഖ് സായിദ് ബിൻ സുൽത്താൻ അൽ നഹ്യാൻ 1971-ൽ ആദ്യമായി പതാക ഉയർത്തിയതിന്റെ ഓർമ്മയിലാണ് നവംബർ മൂന്നിന് രാജ്യം ദേശീയ പതാക ദിനം ആഘോഷിക്കുന്നത്. പതാക ഉയർത്തുമ്പോഴും താഴ്ത്തുമ്പോഴും പാലിക്കേണ്ട മര്യാദകളും നിയമങ്ങളും യുഎഇ അധികൃതർ കർശനമായി ഓർമ്മിപ്പിക്കുന്നു.

അബ്ദുള്ള അൽ മഈന രൂപകൽപ്പന ചെയ്ത ചുവപ്പ്, പച്ച, വെള്ള, കറുപ്പ് നിറങ്ങളിലുള്ള ദേശീയ പതാക ഇമാറാത്തികളുടെ ഹൃദയത്തിൽ ആദരണീയമായ ഒരു സ്ഥാനമാണ് വഹിക്കുന്നത്. ഈ വിശേഷ ദിനത്തിൽ പതാക ഉയർത്തുന്ന ഓരോരുത്തരും ശ്രദ്ധിക്കേണ്ട 10 പ്രധാന കാര്യങ്ങൾ താഴെ നൽകുന്നു:

പതാക ഉയർത്തുമ്പോൾ ചെയ്യേണ്ട കാര്യങ്ങൾ

ഉയർന്ന നിലവാരം ഉറപ്പാക്കുക: പതാക ഉയർന്ന ശതമാനം പോളിസ്റ്റർ മിശ്രിതത്തിൽ മികച്ച നിലവാരത്തിൽ അച്ചടിച്ചിട്ടുള്ളതെന്ന് ഉറപ്പാക്കണം.
നിലം തൊടരുത്: പതാക ഒരിക്കലും നിലത്ത് സ്പർശിക്കരുത്. കൊടിമരത്തിന്റെ ചുവട്ടിൽ നിന്ന് കുറഞ്ഞത് 20 മുതൽ 25 സെന്റീമീറ്റർ വരെ ഉയരത്തിൽ ആയിരിക്കണം ഇത്.
കൊടിമരം: കൊടിമരത്തിൽ പതാകയല്ലാതെ മറ്റൊന്നും ഉണ്ടായിരിക്കരുത്.
വൃത്തിയും മിനുസവും: പതാക എപ്പോഴും വൃത്തിയുള്ളതും ഇസ്തിരിയിട്ടതുമായിരിക്കണം.
പരിശോധന നിർബന്ധം: പതാക ഉയർത്തുന്നതിന് മുമ്പ്, പതാക കീറിയതോ, നിറം മങ്ങിയതോ, കേടുവന്നതോ അല്ലെന്ന് ഉറപ്പാക്കാൻ ശ്രദ്ധാപൂർവ്വം പരിശോധിക്കണം.

പതാകയോട് ചെയ്യരുതാത്ത കാര്യങ്ങൾ

അവഹേളനം ശിക്ഷാർഹം: പതാക വലിച്ചെറിയുകയോ, നശിപ്പിക്കുകയോ, അപമാനിക്കുകയോ, അനുചിതമായി താഴ്ത്തുകയോ ചെയ്യരുത്. അങ്ങനെ ചെയ്യുന്നവർക്ക് 25 വർഷം വരെ തടവും 500,000 ദിർഹം പിഴയും ലഭിക്കും.
മറ്റ് ചിഹ്നങ്ങൾ അരുത്: വെള്ള നിറത്തിലുള്ള സ്പേസിന്റെ മധ്യത്തിൽ രാജ്യത്തിന്റെ ചിഹ്നമുള്ള രാഷ്ട്രപതിയുടെ പതാകയൊഴികെ, മറ്റേതെങ്കിലും ലോഗോയോ ചിഹ്നമോ പതാകയിൽ ചേർക്കാൻ പാടില്ല.
അലങ്കാരങ്ങൾ ഒഴിവാക്കുക: അലങ്കരിച്ച അരികുകളോ മറ്റ് കൂട്ടിച്ചേർക്കലുകളോ പതാകയിൽ ഉണ്ടായിരിക്കരുത്.
ഭക്ഷ്യവസ്തുക്കളിൽ ഉപയോഗിക്കരുത്: മധുരപലഹാരങ്ങൾ, കേക്കുകൾ തുടങ്ങിയ ഭക്ഷ്യവസ്തുക്കളിൽ പതാകയുടെ രൂപം ഉപയോഗിക്കുന്നത് കർശനമായി നിരോധിച്ചിരിക്കുന്നു.
രൂപമാറ്റം വരുത്തരുത്: അലങ്കാരങ്ങൾക്കോ (ബലൂണുകൾ പോലുള്ളവ), ടൈപ്പോഗ്രാഫിക്കോ വേണ്ടി പതാകയുടെ അനുപാതങ്ങൾ, വലുപ്പം, ആകൃതി എന്നിവയിൽ മാറ്റങ്ങൾ വരുത്തരുത്.
പതാക താഴ്ത്തുമ്പോൾ: ശരിയായ രീതിയിൽ മടക്കണം

ഔദ്യോഗിക ആവശ്യങ്ങൾക്ക് ശേഷം പതാക താഴ്ത്തുമ്പോൾ, അത് ശരിയായ രീതിയിൽ മടക്കി സൂക്ഷിക്കുന്നത് പ്രധാനമാണ്. പതാകയെ ബഹുമാനത്തോടെ സംരക്ഷിക്കുന്നതിന്റെ ഭാഗമാണിത്.

പതാക മടക്കുന്നതിന്റെ രീതി

പതാക സാവധാനം താഴ്ത്തിയ ശേഷം നിവർത്തി വെക്കുക.
അതിനുശേഷം, കീറൽ ഒഴിവാക്കിക്കൊണ്ട് കൃത്യമായ അറ്റങ്ങൾ പാലിച്ച്, ത്രികോണാകൃതിയിലാണ് (ട്രയാംഗുലർ ഫോൾഡ്) മടക്കി സൂക്ഷിക്കേണ്ടത്.
പതാക ഒരിക്കലും ചുരുട്ടി വെക്കരുത്, അത് അനാദരവായി കണക്കാക്കും.
യുഎഇ പൗരന്മാരും താമസക്കാരും ഈ ദേശീയ ദിനത്തിൽ രാജ്യത്തിന്റെ ഐക്യത്തിനും അഭിമാനത്തിനും പ്രാധാന്യം നൽകി, നിയമങ്ങളും മര്യാദകളും പാലിക്കണമെന്ന് അധികൃതർ അഭ്യർത്ഥിച്ചു.