ലെബനനുമായുള്ള ബന്ധം ദൃഢമാക്കുന്നതിൽ സുപ്രധാനമായ ചുവടുവയ്പ്പുമായി യുഎഇ; ബെയ്റൂട്ടിലെ യുഎഇ എംബസി വീണ്ടും തുറന്നു

യുഎഇയും ലെബനനും തമ്മിലുള്ള ബന്ധം ശക്തിപ്പെടുത്തുന്നതിനുള്ള ശ്രമങ്ങളുടെ ഭാഗമായി ബെയ്‌റൂട്ടിലെ യുഎഇ എംബസി ഔദ്യോഗികമായി വീണ്ടും തുറക്കുകയും നയതന്ത്ര പ്രവർത്തനങ്ങൾ പുനരാരംഭിക്കുകയും ചെയ്തതായി വിദേശകാര്യ മന്ത്രാലയം (മോഫ) വെള്ളിയാഴ്ച അറിയിച്ചു.

ഇരുരാജ്യങ്ങളും തമ്മിലുള്ള ഉഭയകക്ഷി സഹകരണം മുന്നോട്ട് കൊണ്ടുപോകുന്നതിനുള്ള സുപ്രധാന ചുവടുവയ്പാണ് എംബസി വീണ്ടും തുറക്കുന്നതെന്ന് വിദേശകാര്യ മന്ത്രാലയം അണ്ടർ സെക്രട്ടറി ഒമർ ഉബൈദ് അൽ ഷംസി ഊന്നിപ്പറഞ്ഞു. ലെബനൻ്റെ സ്ഥിരതയ്ക്കും വികസനത്തിനും പിന്തുണ നൽകാനുള്ള യുഎഇയുടെ പ്രതിബദ്ധതയാണ് ഇത് പ്രതിഫലിപ്പിക്കുന്നതെന്ന് അദ്ദേഹം അഭിപ്രായപ്പെട്ടു.

എംബസി വീണ്ടും തുറക്കുന്നത് ഇരു രാജ്യങ്ങളും തമ്മിലുള്ള ദൃഢവും സാഹോദര്യവുമായ ബന്ധത്തിന് അടിവരയിടുന്നുവെന്നും ഇരു രാജ്യങ്ങളുടെയും ജനങ്ങളുടെയും വളർച്ചയും സമൃദ്ധിയും പ്രോത്സാഹിപ്പിക്കുന്നതിന് വിവിധ മേഖലകളിൽ സഹകരിക്കുന്നതിന് കൂടുതൽ അവസരങ്ങൾ സൃഷ്ടിക്കുന്നതായും അൽ ഷംസി അഭിപ്രായപ്പെട്ടു.

ജനുവരി 11 ന് പ്രസിഡൻ്റ് ഷെയ്ഖ് മുഹമ്മദും ലെബനീസ് പ്രസിഡൻ്റ് ജോസഫ് ഔനും തമ്മിലുള്ള ഫോൺ സംഭാഷണത്തെ തുടർന്നാണ് ഈ നീക്കം.

സംഭാഷണത്തിനിടയിൽ, ഷെയ്ഖ് മുഹമ്മദ് ഔണിൻ്റെ തിരഞ്ഞെടുപ്പിനെ അഭിനന്ദിക്കുകയും ലെബനനെ നയിക്കുന്നതിലും അതിലെ ജനങ്ങളുടെ അഭിലാഷങ്ങൾ നിറവേറ്റുന്നതിലും വിജയം ആശംസിക്കുകയും ചെയ്തു. ബെയ്‌റൂട്ടിലെ യുഎഇ എംബസി വീണ്ടും തുറക്കുന്നതിന് ആവശ്യമായ നടപടികളും ഇരു നേതാക്കളും അംഗീകരിച്ചു.