പ്രകാശം ചൊരിയുന്ന ഉരുക്ക് പക്ഷി; പുതിയൊരു റെക്കോർഡ് നേട്ടവുമായി ദുബായ് ​ഗ്ലോബൽ വില്ലേജ്

ദുബായ്: ദുബായ് ​ഗ്ലോബൽ വില്ലേജിൽ നിർമ്മിച്ചിരിക്കുന്ന ഉരുക്ക് പക്ഷി വീണ്ടും പുതിയൊരു റെക്കോർഡ് തീർക്കുകയാണ്. ഗിന്നസ് വേൾഡ് റെക്കോർഡ് സ്ഥിരീകരിച്ച ലോകത്തിലെ ഏറ്റവും വലിയ ഇല്യൂമിനേറ്റഡ് സ്റ്റീൽ ശിൽപം എന്ന പദവിയാണ് ​ഗ്ലോബൽ വില്ലേജിനെ തേടി എത്തിയിരിക്കുന്നത്.

ചിറകുകൾ വിടർത്തി, യുഎഇയുടെ ദേശീയ പക്ഷിയോടുള്ള ആദരസൂചകമായ സ്റ്റീൽ ഫാൽക്കൺ ആണ് പക്ഷിയുടെ രൂപം. 8 മീറ്ററിൽ താഴെ ഉയരത്തിൽ 22 മീറ്ററിലധികം ചിറകുകളുള്ള, 8,000 കിലോഗ്രാം ഭാരമുള്ളതാണ് ഈ പക്ഷിയുടെ രൂപം. 50,000 ലൈറ്റുകളാണ് ഈ ശിൽപ്പത്തിനുമേൽ ഘടിപ്പിച്ചിരിക്കുന്നത്.

യുഎഇയുടെ സംസ്കാരത്തിന്റെയും സ്വത്വത്തിന്റെയും പ്രാധാന്യത്തിന്റെ സ്മരണയ്ക്കായി നിർമ്മിച്ച ഫാൽക്കൺ ഘടന ഗ്ലോബൽ വില്ലേജിൽ മാത്രം കാണാൻ കഴിയുന്ന ഒരത്ഭുത കാഴ്ച തന്നെയാണ്. നിരവധി സന്ദർശകരാണ് സുഹൃത്തുക്കളോടൊപ്പവും കുടുംബത്തോടൊപ്പവും ഈ ഭീമൻ പക്ഷിയെ കാണാനായി ​ഗ്ലോബൽ വില്ലേജിൽ എത്തുന്നത്.