2,300 വീടുകൾ നിർമ്മിക്കും; 5.5 ബില്യൺ ദിർഹം അനുവദിച്ച് ഷെയ്ഖ് മുഹമ്മദ് ബിൻ റാഷിദ്

ദുബായ്: ഈ വർഷത്തെ 33ാം സോഷ്യൽ അജണ്ടയുടെ ഭാ​ഗമായി 2300 ഓളം വീടുകൾ നിർമ്മിച്ച് നൽകും. യു.എ.ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂം പദ്ധതിയ്ക് അംഗീകാരം നൽകി.

‘കുടുംബം നമ്മുടെ രാഷ്ട്രത്തിന്റെ അടിത്തറ’ എന്ന ആഹ്വാനവുമായാണ് പ്രധാനമന്ത്രി പദ്ധതിയ്ക് അം​ഗീകാരം നൽകിയത്. അംഗീകൃത പദ്ധതികളിൽ ദുബായിലെ പൗരന്മാർക്ക് വിതരണം ചെയ്യുന്നതിനായി 3,500 പ്ലോട്ട് ഭൂമിയും ദുബായിലുടനീളമുള്ള 5.5 ബില്യൺ ദിർഹം വിലമതിക്കുന്ന 2,300 റെഡി-ടു-ഇൻ വീടുകളും നിർമ്മിച്ചു നൽകും.

നല്ല പാർപ്പിടം, ക്ഷേമ നടപടികൾ, നാളെയെക്കുറിച്ചുള്ള ഉറപ്പ്, വിശ്വാസം എന്നിവയെല്ലാം എമിറേറ്റിലെ സാമൂഹിക ഐക്യം വർദ്ധിപ്പിക്കുന്നതിലേക്ക് നയിക്കുമെന്ന് പ്രധാനമന്ത്രി പറ‍‍ഞ്ഞു. പൗരൻമാരുടെ മുഴുവൻ അവകാശങ്ങളും സംരക്ഷിക്കപ്പെടാനും അവർക്ക് ​ഗുണനിലവാരമുള്ള ജീവിത സാഹചര്യമൊരുക്കാനും ഇത്തരം പദ്ധതികൾ ഇനിയും പ്രഖ്യാപിക്കുമെന്നും ഷെയ്ഖ് മുഹമ്മദ് ബിൻ റാഷിദ് അൽ മക്തൂം വ്യക്തമാക്കി.