ഷെയ്ഖ് മുഹമ്മദും – മോദിയും ചേർന്ന് ജയ്‍വാൻ റുപേ കാർഡ് പുറത്തിറക്കി

യുഎഇയിൽ പുതിയ ആഭ്യന്തര പേയ്‌മെൻ്റ് കാർഡ് അവതരിപ്പിച്ചു. ജയ്‌വാൻ എന്ന് വിളിക്കപ്പെടുകയും ഇന്ത്യയുടെ ഡിജിറ്റൽ റുപേ ക്രെഡിറ്റ്, ഡെബിറ്റ് കാർഡ് സ്റ്റാക്കിൽ നിർമ്മിക്കുകയും ചെയ്ത ഇത് ചൊവ്വാഴ്ച പ്രസിഡൻ്റ് ഷെയ്ഖ് മുഹമ്മദും ഇന്ത്യൻ പ്രധാനമന്ത്രി നരേന്ദ്ര മോദിയും അവതരിപ്പിച്ചു.

ജയ്‍വാൻ റുപേ കാർഡ് പുറത്തിറക്കുന്നത് സംബന്ധിച്ച് ഇരു രാജ്യങ്ങളും തമ്മിൽ ഒരു കരാറിൽ ഏർപ്പെടുകയും ചെയ്യ്തു. ആഗോള തലത്തിൽ ഇന്ന് ശ്രദ്ധാകേന്ദ്രമായിക്കൊണ്ടിരിക്കുന്നതും ഉപഭോക്താക്കളുടെയും ഇടപാടുകളുടേയും എണ്ണത്തിൽ ലോകത്ത് ഒന്നാം സ്ഥാനത്ത് നിൽക്കുന്നതുമായ ഇന്ത്യയു‌ടെ യൂണിഫൈഡ് പേയ്മെന്റ്സ് ഇന്റർഫേസ് (UPI) സംവിധാനം അഥവാ യുപിഐയും യു.എ.ഇയുടെ അഡ്വാൻസ്ഡ് ഏലിയന്റ് നെറ്റ്‍വർക്ക് ഇന്റർഫേസ് (AANI) സംവിധാനം അഥവാ എഎഎൻഐയും തമ്മിൽ സംയോജിപ്പിക്കുന്നതിനുള്ള കരാറിലാണ് ഇരു രാജ്യങ്ങളും ഒപ്പുവച്ചത്.

യുപിഐയും എഎഎൻഐയും തമ്മിൽ പരസ്പരം ബന്ധിപ്പിക്കുന്നതോടെ യുഎഇയിലെ ഇന്ത്യൻ പ്രവാസികൾക്ക് അതിവേഗത്തിലും താരതമ്യേന എളുപ്പത്തിലും പണമിടപാട് നടത്താനും പണകൈമാറ്റത്തിനുള്ള ചെലവ് കുറയ്ക്കാനും സഹായിക്കും.

യുഎഇയും ഇന്ത്യയും തമ്മിലുള്ള സാമ്പത്തിക സഹകരണം ശക്തിപ്പെടുത്താനും വ്യാപാര ബന്ധം വളർത്താനും ടൂറിസം മേഖലയ്ക്കും ഗുണകരമാണെന്നാണ് റിപ്പോർട്ടുകൾ സൂചിപ്പിക്കുന്നത്.

ഇന്ത്യ തദ്ദേശീയമായി വികസിപ്പിച്ച ഇല‌ക്ട്രോണിക് ഫണ്ട് ട്രാൻസ്ഫർ സാങ്കേതിക വിദ്യയായ റൂപേ (RuPay) അടിസ്ഥാനമാക്കി യുഎഇ അവതരിപ്പിക്കുന്ന ക്രെഡിറ്റ്, ഡെബിറ്റ് കാർഡ് ശൃംഖലയാണ് ജയ്‌വാൻ (JAYWAN).

ആഗോള ബ്രാൻഡുകളായ വിസ, മാസ്റ്റർ കാർഡ് എന്നിവയുമായി കിടപിടിക്കുന്ന കാർഡ് പേയ്മെന്റ് സംവിധാനമായി ഇന്ന് ലോകം ശ്രദ്ധിക്കുന്ന ശൃംഖലയാണ് റുപേയുടേത്.

യുഎഇയുടെ പരിധിക്കുളളിൽ ആഭ്യന്തര ഇടപാടുകൾ (ട്രാൻസാക്ഷൻ) നടത്തുന്നതിനായാണ് ജയ്‌വാൻ കാർഡ് രൂപകൽപന ചെയ്തിരിക്കുന്നത്. നിലവിൽ യുഎഇയിലെ നാല് ബാങ്കുകളാണ് ഈ കാർഡ് വിതരണം ചെയ്യുന്നത്.

അബുദാബി ബാങ്ക്, അബുദാബി കൊമേഷ്യൽ ബാങ്ക്, മഷ്റീഖ് ബാങ്ക്, കൊമേഷ്യൽ ബാങ്ക് ഓഫ് ദുബായ്‌‌‌ തുടങ്ങിയ ബാങ്കുകളാണ് ജയ്‌വാൻ കാർഡ് നൽകുന്നത്. ഇന്ത്യൻ കാർഡ് പേയ്മെന്റ് ശൃംഖലയായ റുപേയാണ് ജയ്‌വാൻ കാർഡിനു വേണ്ട നെറ്റ്‍വർക്ക് സജ്ജമാക്കുന്നത്.

കോൺടാക്ട്‍ലെസ് പണമിടപാട്, പ്രത്യേക വിഭാഗങ്ങളിൽ ക്യാഷ്ബാക്ക് ആനുകൂല്യങ്ങൾ, തെരഞ്ഞെ‌ടുത്ത കടകളിൽ ഡിസ്കൗണ്ട് ഓഫറുകൾ, തട്ടിപ്പ് ത‌‌ടയാനുള്ള സംവിധാനം, സുരക്ഷിത ഓൺലൈൻ പണമിടപാട് എന്നിവയൊക്കെയാണ് ജയ്‌വാൻ കാർഡിന്റെ ഗുണവശങ്ങൾ.

എമിറേറ്റ്സ് തിരിച്ചറിയിൽ രേഖ കൈവശമുള്ളവരും യുഎഇയിൽ താമസിക്കുന്നവരുമായ എല്ലാവർക്കും ജയ്‌വാൻ കാർഡിന് അപേക്ഷിക്കാം.