സൗദി: സൗദി അറേബ്യയിൽ കടലാമയുടെ ആകൃതിയിൽ ഫ്ലോട്ടിംഗ് സിറ്റി വരുന്നു. എട്ട് ബില്ല്യൺ ഡോളർ ചിലവിൽ സഞ്ചരിക്കുന്ന വലിയൊരു കപ്പലാണ് പദ്ധതി. കപ്പലിനുള്ളിൽ എല്ലാ സൗകര്യങ്ങളുമുള്ള ഒരു സിറ്റി തന്നെയുണ്ടാകും. പാൻഗിയോസ്(Pangeos) എന്നാണ് ഫ്ലോട്ടിംഗ് സിറ്റിക്ക് പേര് നൽകുന്നത്. 200 ദശലക്ഷം വർഷങ്ങൾക്ക് മുമ്പ് സൗദിയിൽ ഉണ്ടായിരുന്ന ഭൂഖണ്ഡമായ പാംഗിയ(Pangea)യുടെ പേരിലാണ് ഈ നൗകയെ പാൻഗിയോസ് എന്ന് വിളിക്കുന്നത്.
1800 അടി നീളത്തിൽ നിർമ്മിക്കുന്ന പാൻഗിയോസ് ഫ്ലോട്ടിംഗ് സിറ്റി ലോക റെക്കോർഡുകളിൽ ഇടംപിടിക്കുമെന്നുറപ്പാണ്. ലോകത്തിലെ ഏറ്റവും വലിയ നൗകയായ അസാമിനെക്കാൾ മൂന്നിരട്ടി നീളമുണ്ട് പാൻഗിയോസിന്.
സൗദി അറേബ്യയും ലസാരിനി ഡിസൈൻ സ്റ്റുഡിയോയും ചേർന്നാണ് പദ്ധതി രൂപകൽപ്പന ചെയ്യുന്നത്. പൂർണ്ണമായും സഞ്ചരിക്കുന്ന ഒരു നഗരം എന്ന ആശയത്തിൽ നിന്നാണ് പാൻഗിയോസ് പിറവിയെടുക്കുന്നതെന്ന് ലസാരിനി പറയുന്നു.
ഷോപ്പിംഗ് മാളുകൾ, ഹോട്ടലുകൾ, റെസ്റ്റോറന്റുകൾ, പൊതു പാർക്കുകൾ, ചെറിയ കപ്പലുകൾക്കുള്ള തുറമുഖങ്ങൾ, റെസിഡൻഷ്യൽ ഏരിയകൾ എന്നിവയാണ് പാൻഗിയോസിലുള്ളത്. മാത്രമല്ല, ലോകം മുഴുവൻ ചുറ്റി സഞ്ചരിക്കാനുള്ള ശേഷി പാൻഗിയോസിൽ ഒരുക്കും.
പൂർണ്ണമായും സൗരോർജത്തിലാണ് കപ്പൽ പ്രവർത്തിക്കുക. ഇതിനായി കപ്പലിന്റെ മുകൾഭാഗം സോളാർ പാനലുകൾ കൊണ്ട് മൂടുന്ന രീതിയിൽ രൂപകൽപ്പന ചെയ്യും. പദ്ധതിയുടെ നിർമ്മാണം 2033ൽ തുടങ്ങാനാകുമെന്നും ഇത് പൂർത്തിയാക്കാൻ എട്ട് വർഷമെടുക്കുമെന്നും ലസാരിനി ഡിസൈൻ സ്റ്റുഡിയോ പറയുന്നു.
+ There are no comments
Add yours