കേരളത്തിൽ കണ്ണൂരിലെയും കർണാടകയിൽ മൈസൂരുവിലെയും വിമാനത്താവളങ്ങളുമായി എയർ കേരള കരാറുകളിൽ ഒപ്പിട്ടു. എടിആർ 72-600 വിമാനം ഉപയോഗിച്ച്‌ 2025ന്റെ ആദ്യ പകുതിയിൽ സർവീസുകൾ ആരംഭിക്കാനാണ്‌ പദ്ധതി.
“എയർ കേരള എന്ന നിലയിൽ ഞങ്ങൾക്ക് ഇതൊരു വലിയ ചുവടുവയ്പ്പാണ്, ഈ വർഷം ജൂണോടെ ആഭ്യന്തര സർവീസുകൾ ആരംഭിക്കുന്നതിനുള്ള പാതയിലാണ് ഞങ്ങൾ,” എയർലൈൻ ചെയർമാൻ അഫി അഹമ്മദ് പറഞ്ഞു. “കണ്ണൂരും മൈസൂരുവുമായുള്ള സഹകരണം പ്രാദേശിക കണക്റ്റിവിറ്റി വർദ്ധിപ്പിക്കുന്നതിനുള്ള ഞങ്ങളുടെ പ്രതിബദ്ധതയെ അടിവരയിടുന്നുവെന്നും അദ്ദേഹം കൂട്ടിചേർത്തു.
ഷാർജ ആസ്ഥാനമാക്കി പ്രവർത്തിക്കുന്ന എയർ കേരളയ്‌ക്ക്‌ 2024 ജൂലൈ മാസത്തിൽ കേന്ദ്ര വ്യോമയാന മന്ത്രാലയത്തിൽ നിന്നുള്ള നോ-ഒബ്‌ജക്ഷൻ സർട്ടിഫിക്കറ്റ്‌ ലഭിച്ചിരുന്നു. എയർ ഓപ്പറേറ്റർ സർട്ടിഫിക്കറ്റിനായുള്ള നടപടിക്രമങ്ങൾ അവസാന ഘട്ടത്തിലാണ്‌. സെറ്റ്‌ഫ്ലൈ ഏവിയേഷൻ പ്രൈവറ്റ്‌ ലിമിറ്റഡിന്റെ കീഴിലാണ്‌ എയർ കേരള പ്രവർത്തിക്കുക.
കുറഞ്ഞ ചിലവ്
യുഎഇ സംരംഭകരായ അഫി അഹമ്മദും (ചെയർമാൻ, സ്‌മാർട്ട്‌ ട്രാവൽ ഗ്രൂപ്പ്‌) ആയൂബ്‌ കല്ലടയുമാണ്‌ (ചെയർമാൻ ആൻഡ്‌ എംഡി, കല്ലട ഫുഡ്‌ ഇൻഡസ്‌ട്രീസ്‌) എയർ കേരളയുടെ ചെയർമാനും വൈസ്‌ ചെയർമാനും. ഹരീഷ് മൊയ്‌ദീൻ കുട്ടിയാണ്‌ സിഇഒ. തുടക്കത്തിൽ മൂന്ന് എടിആർ 72-600 വിമാനങ്ങളുമായി സർവീസ്‌ ആരംഭിച്ച്‌ പിന്നീട്‌ 20 വിമാനങ്ങളുമായി രാജ്യാന്തര സർവീസുകൾ അടക്കം നടത്താനാണ്‌ എയർ കേരളയുടെ ദീർഘകാല പദ്ധതി. പ്രവാസികളായ മലയാളികൾ അനുഭവിക്കുന്ന യാത്രപ്രശ്‌നങ്ങൾക്ക്‌ പരിഹാരം കണ്ട്‌ കുറഞ്ഞ ചെലവിൽ വിശ്വസ്‌തമായ വ്യോമയാന സേവനങ്ങളാണ്‌ എയർ കേരളയുടെ വാഗ്‌ദാനം.
നിയമനം
പ്രവർത്തനം ആരംഭിക്കുന്നതിന് മുമ്പ് പരിചയസമ്പന്നരായ എയർലൈൻ പ്രൊഫഷണലുകളെ നിയമിക്കുന്നതിലാണ് എയർലൈൻ ഇപ്പോൾ ശ്രദ്ധ കേന്ദ്രീകരിക്കുന്നത്. യു.എ.ഇ, ജി.സി.സി എന്നിവിടങ്ങളിൽ നിന്ന് വ്യോമയാന വിദഗ്ധരെ നിയമിക്കുന്നത് ഞങ്ങൾ നോക്കുകയാണെന്നും വാണിജ്യ, ഓപ്പറേഷൻ വിഭാഗങ്ങളിൽ പരിചയമുള്ളവർക്ക് മുൻഗണന നൽകുമെന്നും അഫി അഹമ്മദ് പറഞ്ഞു. ഇതിന്റെ ഭാഗമായി എടിആർ 72-600ലേക്കുള്ള പൈലറ്റുകളുടെ നിയമന നടപടികളും അടുത്തിടെ കമ്പനി ആരംഭിച്ചിരുന്നു.
കഴിഞ്ഞ വർഷം, എയർലൈൻ അതിൻ്റെ ഉയർന്ന സ്ഥാനങ്ങളിൽ പരിചയസമ്പന്നരായ ഉദ്യോഗാർത്ഥികളെ കൊണ്ട് നിറഞ്ഞിരുന്നു. വിമുക്തഭടനായ ഹരീഷ് കുട്ടിയെ സിഇഒ ആയും, ഏവിയേഷൻ ഫിനാൻസിൽ മൂന്ന് പതിറ്റാണ്ടിലേറെ വൈദഗ്ധ്യമുള്ള ചാർട്ടേഡ് അക്കൗണ്ടൻ്റായ കീർത്തി റാവുവിനെ കമ്പനിയുടെ ചീഫ് ഫിനാൻഷ്യൽ ഓഫീസറായും നിയമിച്ചു. ഇന്ത്യൻ പൈലറ്റ്സ് ഫെഡറേഷൻ്റെ പ്രസിഡൻ്റായ ക്യാപ്റ്റൻ സിഎസ് രൺധാവ, ബിസിഎഎസിലെ പ്രമുഖ പോസ്റ്റ് ഹോൾഡർ ക്യാപ്റ്റൻ അശുതോഷ് വസിഷ്ഠ് എന്നിവരും എയർലൈനിലെ പ്രധാന സ്ഥാനങ്ങൾ വഹിക്കുന്നു
+ There are no comments
Add yours