കുടുംബവുമായി കുവൈറ്റിലെത്താൻ കടമ്പകളേറെ; പ്രവാസികൾക്കുള്ള ആശ്രിത വിസ നിയമങ്ങൾ പരിഷ്കരിച്ച് കുവൈറ്റ്

ദുബായ്: കുവൈറ്റിൽ ഞായറാഴ്ച മുതൽ പ്രാബല്യത്തിൽ വരുന്ന ആശ്രിത വിസയ്ക്കുള്ള അപേക്ഷാ പ്രക്രിയയിൽ സുപ്രധാന മാറ്റങ്ങൾ പ്രഖ്യാപിച്ച് കുവൈറ്റ് ആഭ്യന്തര മന്ത്രാലയം.

ഉപപ്രധാനമന്ത്രിയും പ്രതിരോധ മന്ത്രിയും ആക്ടിംഗ് ആഭ്യന്തര മന്ത്രിയുമായ ഷെയ്ഖ് ഫഹദ് അൽ യൂസഫിൻ്റെ നിർദ്ദേശത്തെ തുടർന്നാണ് നടപടി.

പുതുക്കിയ ചട്ടങ്ങൾ അനുസരിച്ച്, കുടുംബത്തെ കുവൈറ്റിലേക്ക് കൊണ്ടുവരാൻ ആഗ്രഹിക്കുന്ന പ്രവാസികൾക്ക് ഇനി കൂടുതൽ കർശനമായ നിബന്ധനകൾ പാലിക്കേണ്ടിവരും.

പുതുക്കിയ നിയമമനുസരിച്ച് ആശ്രിത വിസ ലഭിക്കാൻ 800 കുവൈറ്റ് ദിനാർ എങ്കിലും കുറഞ്ഞ ശമ്പള പരിധിയായി നിർബന്ധമാക്കുന്നു. കൂടാതെ, അപേക്ഷകർ ഒരു യൂണിവേഴ്സിറ്റി ബിരുദം കൈവശം വയ്ക്കേണ്ടതുണ്ട്, കൂടാതെ കുവൈറ്റിലെ അവരുടെ തൊഴിൽ അവരുടെ അക്കാദമിക് യോഗ്യതകളുമായി പൊരുത്തപ്പെടണം.

ആശ്രിത വിസ അനുവദിക്കുന്ന പ്രക്രിയ കാര്യക്ഷമമാക്കുന്നതിനും ഫാമിലി വിസയ്ക്ക് അപേക്ഷിക്കുന്ന പ്രവാസികൾ നിർദ്ദിഷ്ട മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കുന്നതിനുമുള്ള ശ്രമത്തിൻ്റെ ഭാഗമായാണ് ഈ മാറ്റങ്ങൾ. വിദ​ഗ്ധരും വിദ്യാസമ്പന്നരുമായ പ്രൊഫഷണലുകളെ
കുവൈറ്റിലേക്ക് ആകർഷിക്കുന്നതിലും നിലനിർത്തുന്നതിലും ശ്രദ്ധ കേന്ദ്രീകരിച്ചുകൊണ്ട് കൂടിയാണ് കുവൈറ്റിന്റെ പുതിയ നടപടി.