ദുബായ്, അബുദാബി, ഷാർജ; പുതുവത്സര ദിനത്തിൽ സൗജന്യ പാർക്കിം​ഗ്.

അബുദാബി: പുതുവത്സര ദിനമായ ഇന്ന് 2024 ജനുവരി ഒന്ന് തിങ്കളാഴ്ച യുഎഇയിലെ പ്രധാന എമിറേറ്റുകളിൽ അധികൃതർ സൗജന്യ പൊതുപാർക്കിം​ഗ് പ്രഖ്യാപിച്ചു. ദുബായ്, അബുദാബി, ഷാർജ എമിറേറ്റുകളിലാണ് സൗജന്യ പാർക്കിം​ഗ് അനുവദിച്ചത്. ചൊവ്വാഴ്ച മുതൽ പഴയ രീതിയിലുള്ള പാർക്കിങ് ഫീസ് സംവിധാനം തുടരും.

ഞായറാഴ്ചകളിൽ സൗജന്യ പാർക്കിങ് നിലവിലുള്ളതിനാൽ തുടർച്ചയായി രണ്ടു ദിവസമാണ് ദുബായിൽ താമസക്കാർക്ക് സൗജന്യ പാർക്കിം​ഗ് ലഭിച്ചിരിക്കുന്നത്. മൾട്ടി ലെവൽ പാർക്കിം​ഗുകൾ ഒഴികെയുള്ള സ്ഥലങ്ങളിലാണ് പാർക്കിം​ഗ് സൗജന്യമാക്കിയതെന്ന് ദുബായ് റോഡ് ഗതാഗത അതോറിറ്റി (ആർടിഎ) അറിയിച്ചു.

ഷാർജ മുനിസിപ്പാലിറ്റിയും അബുദാബി മുനിസിപ്പാലിറ്റി ആന്റ് ട്രാൻസ്പോർട്ട് വകുപ്പിന്റെ ഇന്റഗ്രേറ്റഡ് ട്രാൻസ്പോർട്ട് സെന്ററും (ഐടിസി) സോഷ്യൽ മീഡിയ പ്ലാറ്റ്ഫോമുകളിലൂടെയാണ് സൗജന്യ പാർക്കിം​ഗ് വിവരം പ്രഖ്യാപിച്ചത്. ഷാർജയിൽ, ഏഴ് ദിവസത്തെ പണമടച്ചുള്ള പബ്ലിക് പാർക്കിം​ഗ് സോണുകൾക്ക് ഈ ഇളവ് ബാധകമല്ല.