കോപ്-28 വെറും 4 ദിവസം കൊണ്ട് 57 ബില്യൺ ഡോളർ സമാഹരിച്ചു

ദുബായ്: ആ​ഗോള കാലാവസ്ഥ ഉച്ചക്കോടി(കോപ്-28)ക്ക് ദുബായ് വേദിയായിട്ട് നാലാം ദിവസം പിൻതുടരുമ്പോൾ 57 ബില്യൺ ഡോളറാണ് സമ്മേളനം സമാഹരിച്ചത്.

ദുബായിൽ നടന്ന സമ്മേളനം കഴിഞ്ഞ് നാല് ദിവസത്തിനുള്ളിൽ 57 ബില്യൺ ഡോളർ കാലാവസ്ഥാ ആഘാത പ്രവർത്തനങ്ങൾക്കായി സമാഹരിച്ചതായി കോപ്-28 പ്രസിഡന്റ് സുൽത്താൻ അൽ ജാബറാണ് ഔദ്യോ​ഗികമായി അറിയിച്ചത്. ‘ഇത് കാലാവസ്ഥാ വ്യതിയാന പരിഹാര പ്രവർത്തനത്തിൽ ഒരു നാഴികകല്ലായി അടയാളപ്പെട്ടു കിടക്കു’മെന്നും അദ്ദേഹം പറഞ്ഞു.

യുഎഇ ആതിഥേയത്വം വഹിക്കുന്ന കോപ്-28 ൽ പങ്കെടുക്കാൻ ലോകത്തിന്റെ നാനാഭാ​ഗത്ത് നിന്നും ബിസിനിസ്സുക്കാരും ശതകോടീശ്വരൻമാരും ദുബായിലേക്ക് പറന്നിറങ്ങിയിരുന്നു.

സമ്മേളനത്തിലെ ചരിത്രപരമായ കരാറുകളും പ്രഖ്യാപനങ്ങളും ഭാവിയിൽ കാലാവസ്ഥാ വ്യതിയാനം ഉയർത്തുന്ന അടിയന്തിര വെല്ലുവിളികളെ അഭിമുഖീകരിക്കാൻ ലോകരാജ്യങ്ങൾക്ക് സഹായകമാകും.

കാലാവസ്ഥാ ആഘാത പ്രവർത്തനങ്ങൾക്കായി ഒരു ഫണ്ട് ഇതാദ്യമായാണ് ഒരു സമ്മേളനത്തിലൂടെ ഇത്രയേറെ തുക സമാഹരിക്കുന്നത്.