ഓടുന്ന കാറിന്റെ റൂഫ് ടോപ്പുകളിൽ കയറി നിൽക്കരുത്; 60 ദിവസത്തേക്ക് വാഹനം കണ്ടുകെട്ടും, 50,000 ദിർഹം പിഴയും – ദുബായ് പോലീസ്

ദുബായ്: യാത്ര ചെയ്യുമ്പോൾ കൈയ്യോ, തലയോ ശരീരത്തിന്റെ മറ്റേതെങ്കിലും ഭാ​ഗമോ വാഹനത്തിന്റെ റൂഫ് ടോപ്പുകൾ വഴി ആണെങ്കിൽ പോലും പുറത്തിടുന്നത് ശിക്ഷാർഹമാണെന്ന് ദുബായ് പോലീസ് അറിയിച്ചു.

ഇത്തരം പ്രവൃത്തികൾ റോഡ് സുരക്ഷാ ലംഘനമാണ്, ഇത് വാഹനമോടിക്കുന്നയാൾക്ക് 2,000 ദിർഹം പിഴയും 23 ബ്ലാക്ക് പോയിൻ്റുകളും ലഭിക്കാൻ ഇടയാക്കും. കൂടാതെ വാഹനം 60 ദിവസത്തേക്ക് കണ്ടുകെട്ടും. ഇങ്ങനെ കണ്ടുകെട്ടിയ വാഹനം വിട്ടുനൽകാൻ ഉടമ 50,000 ദിർഹം കൂടി നൽകണം, ദുബായ് പോലീസ് വെള്ളിയാഴ്ച സോഷ്യൽ മീഡിയയിൽ പങ്കിട്ട വീഡിയോയിൽ മുന്നറിയിപ്പ് നൽകി.

ഓടുന്ന വാഹനങ്ങളിൽ നിന്ന് വ്യക്തികൾ വീണ് കഴിഞ്ഞ വർഷം അഞ്ച് പേർക്ക് പരിക്കേറ്റതായി ദുബായ് പോലീസ് അറിയിച്ചു. “സ്വന്തം ജീവനും മറ്റുള്ളവരുടെ ജീവനും അപകടത്തിലാക്കുന്ന തരത്തിൽ” ഡ്രൈവർമാരെ പിടികൂടിയതിനെ തുടർന്ന് 1,183 നിയമലംഘനങ്ങൾ രജിസ്റ്റർ ചെയ്യുകയും 707 വാഹനങ്ങൾ പിടിച്ചെടുക്കുകയും ചെയ്തു.

അപകടകരമായ രീതികളിൽ “ഒരാളുടെ തല പുറത്തെടുകയോ ശരീരത്തിൻ്റെ ഏതെങ്കിലും ഭാഗം പുറത്തു കാണിക്കുകയോ ചെയ്യുക, സൺറൂഫിൽ നിന്ന് പുറത്ത് നിൽക്കുകയും ഒരു വാഹനം നീങ്ങുമ്പോൾ മേൽക്കൂരയിൽ ഇരിക്കുകയും ചെയ്യുന്നതെല്ലാം ശിക്ഷാർഹമായ കുറ്റകരമാണെന്ന് ദുബായ് പോലീസിലെ ജനറൽ ഡിപ്പാർട്ട്‌മെൻ്റ് ഓഫ് ട്രാഫിക് ഡയറക്ടർ മേജർ ജനറൽ സെയ്ഫ് മുഹൈർ അൽ മസ്‌റൂയി പറഞ്ഞു.

വാഹനമോടിക്കുന്നവരും യാത്രക്കാരും കാൽനടയാത്രക്കാരും ട്രാഫിക് നിയമങ്ങളും ചട്ടങ്ങളും പാലിച്ചാൽ മാത്രമേ പല റോഡപകടങ്ങളും തടയാനാകൂ എന്നും അദ്ദേഹം കൂട്ടിച്ചേർത്തു.

എല്ലാ റോഡ് ഉപയോക്താക്കളുടെയും സുരക്ഷ ഉറപ്പാക്കാൻ എല്ലാത്തരം നിയമലംഘനങ്ങളും തടയാൻ കർശന നിയമം കൊണ്ടുവരുമെന്ന് ദുബായ് പോലീസ് അറിയിച്ചു. റോഡ് സുരക്ഷാ ലംഘനങ്ങൾ ദുബായ് പോലീസ് ആപ്പിലെ “പോലീസ് ഐ” സേവനത്തിലൂടെയോ അല്ലെങ്കിൽ 901 എന്ന നമ്പറിൽ “വി ആർ ഓൾ പോലീസ്” സേവനത്തിലൂടെയോ അറിയിക്കാൻ അവർ പൊതുജനങ്ങളോട് അഭ്യർത്ഥിച്ചു.