4,238 മീറ്റർ രണ്ട് സെൻട്രൽ മാർക്കറ്റ്, മൾട്ടി പർപ്പസ് പാർക്കുകൾ; വമ്പൻ പദ്ധതിയുമായി ബഹ്റൈൻ

ബഹ്റൈൻ: ബഹ്റൈനിൽ ഒരുങ്ങുന്നത് രണ്ട് വമ്പൻ പദ്ധതികൾ. 4,238 ചതുരശ്ര മീറ്ററിൽ വ്യാപിച്ചുകിടക്കുന്ന സെൻട്രൽ മാർക്കറ്റ് വികസന പദ്ധതിയും ബ്ലോക്ക് 611-ൽ രണ്ട് പുതിയ മൾട്ടി പർപ്പസ് പാർക്കുകൾ സ്ഥാപിക്കുന്നതും ഉൾപ്പെടെ സിത്രയിലെ പ്രധാന പദ്ധതികൾ വികസിപ്പിക്കുന്നതിനുള്ള പദ്ധതികൾ പുരോഗമിക്കുകയാണ്.

ബഹ്‌റൈൻ ക്യാപിറ്റൽ ഗവർണറേറ്റ് മെച്ചപ്പെടുത്തൽ പദ്ധതികളുടെ ഭാഗമാണിത്. സിത്രയിലെ പദ്ധതി പ്രദേശങ്ങളിൽ നടത്തിയ പരിശോധനയിൽ, മുനിസിപ്പാലിറ്റി കാര്യ-കൃഷി മന്ത്രി വെയ്ൽ ബിൻ നാസർ അൽ മുബാറക്, വർക്ക്സ് മന്ത്രി ഇബ്രാഹിം ബിൻ ഹസൻ അൽ ഹവാജ് എന്നിവർ ക്യാപിറ്റൽ ഗവർണറേറ്റിലെ സിത്രയിലെ പദ്ധതികളുടെ പുരോ​ഗതി വിലയിരുത്തി.

അടിസ്ഥാന സൗകര്യങ്ങൾ വർധിപ്പിക്കുകയും ഉയർന്ന നിലവാരമുള്ള മുനിസിപ്പൽ, യൂട്ടിലിറ്റി സേവനങ്ങൾ നൽകുകയും ചെയ്യുന്ന സേവന പദ്ധതികൾ നടപ്പിലാക്കാൻ മന്ത്രാലയം പ്രതിജ്ഞാബദ്ധമാണെന്ന് അൽ മുബാറക് പറഞ്ഞു.

സിത്രയിലെ ബ്ലോക്ക് 608ൽ 8,200 ചതുരശ്ര മീറ്റർ വിസ്തീർണമുള്ള പുതിയ ഫുട്ബോൾ സ്റ്റേഡിയം നിർമ്മിക്കാനും പദ്ധതിയുണ്ട്. ബഹ്‌റൈനിലെ നഗര, നിക്ഷേപ വികസനത്തിന് സംഭാവന നൽകുന്ന അടിസ്ഥാന സൗകര്യ വികസന പദ്ധതികൾ ഉൾക്കൊള്ളിച്ചുകൊണ്ട് വർക്ക്സ് മന്ത്രാലയം വികസന പദ്ധതികൾ ബഹ്റൈനിൽ നടപ്പിലാക്കി കൊണ്ടിരിക്കുകയാണ്.