15,000 പേർക്കുള്ള ഭക്ഷണം, 2 കിലോമീറ്റർ നീളമുള്ള ഡൈനിംഗ് ഏരിയ: യുഎഇയിലെ ഏറ്റവും വലിയ ഇഫ്താർ സംഗമം നടത്തി ഒരു പാർക്ക്

അജ്മാൻ: വ്യാഴാഴ്ച വൈകുന്നേരത്തോടെ, അജ്മാനിലെ അൽ സഫിയ പാർക്ക് വലിയൊരു ഡൈനിംഗ് സങ്കേതമായി മാറി. ഒരുപക്ഷേ യുഎഇയിലെ ഏറ്റവും ദൈർഘ്യമേറിയ ഇഫ്താറിന് കൂടിയാണ് ഈ പാർക്ക് ആതിഥേയത്വം വഹിച്ചത്. അജ്മാനിലെ താമസക്കാർക്കും അവരുടെ കുടുംബങ്ങൾക്കും ഉൾപ്പെടെ 15,000 പേർക്കുള്ള ഭക്ഷണം വിളമ്പി, പാർക്ക് ഐക്യത്തിൻ്റെയും ഒരുമയുടെയും പ്രതീകമായി മാറി.

എമിറേറ്റ്‌സ് റെഡ് ക്രസൻ്റ് സൊസൈറ്റി സംഘടിപ്പിച്ച ഈ മഹത്തായ പരിപാടി സമൂഹത്തിൽ സഹവർത്തിത്വ ബോധം വളർത്തിയെടുക്കാൻ ലക്ഷ്യമിട്ടുള്ളതാണ്.

കഴിഞ്ഞദിവസം വൈകുന്നേരം ഏകദേശം നാലു മണി ആയതോടെ സൊസൈറ്റിയിൽ നിന്നുള്ള സന്നദ്ധ പ്രവർത്തകർ പാർക്കിനു കുറുകെ നേർത്ത പ്ലാസ്റ്റിക് ഷീറ്റുകൾ രണ്ട് കിലോമീറ്റർ നീളത്തിൽ വിരിച്ചു. ഇവരുടെ കൂട്ടായ പരിശ്രമം ഇഫ്താറിൽ പങ്കെടുക്കുന്ന എല്ലാവർക്കും ഇരിക്കാനുള്ള വിശാലമായ ഇടമാണ് ഒരുക്കിയത്.

വിശുദ്ധ റമദാൻ മാസത്തിൽ പരമ്പരാഗത ഭക്ഷണത്തിൽ പങ്കുചേരാൻ ലേബർ ക്യാമ്പുകളിൽ നിന്ന് നിരവധി വിശ്വാസികളെയും കൊണ്ട് സ്കൂൾ ബസ്സുകൾ എത്തി.

കുടുംബങ്ങളും തൊഴിലാളികളും മറ്റ് അതിഥികളും പാർക്കിൽ ഒത്തുകൂടി, ഇഫ്താറിന് നിമിഷങ്ങൾക്ക് മുമ്പ്, വിശ്വാസികൾ അനുഗ്രഹം തേടി അല്ലാഹുവിനോട് പ്രാർത്ഥിക്കാൻ ഒരു നിമിഷം എടുത്തു.

ഭക്ഷണ പെട്ടികളിൽ പഴങ്ങൾ, ഈത്തപ്പഴം, വെള്ളം, സാലഡ്, വിഭവസമൃദ്ധമായ ചോറ് ഭക്ഷണം എന്നിവയുൾപ്പെടെ ഒരു കൂട്ടം ഇനങ്ങളുണ്ടായിരുന്നു, എല്ലാ അതിഥികൾക്കും ആരോഗ്യകരവും സംതൃപ്തവുമായ ഇഫ്താർ അവർ ഒരുമിച്ച് ആസ്വദിച്ചു. അങ്ങനെ തങ്ങളുടെ നോമ്പ് ഐക്യത്തോടെ അവർ അന്നേ ദിവസം അവസാനിപ്പിച്ചു.